Testohet në Tiranë votimi dhe numërimi elektronik
Celibashi: Rezultati mund të dalë brenda 30 minutave
Kur na ndajnë tri javë nga zgjedhjet parlamentare, Komisioni Qendror i Zgjedhjeve ka testuar pajisjet që do të bëjnë të mundur zbatimin e projektit pilot për votimin elektronik.
Kujtojmë që projekti do të zbatohet vetëm në njësinë numër 10 në kryeqytet. Testimi i zhvilluar në prani të Komisionerit të Zgjedhjeve, Ilirjan Celibashi, ka qenë i suksesshëm, ku nga simulimi, votuesit, pasi identifikohen elektronikisht përmes shenjave të gishtërinjve dhe kartës së identitetit, paraqiten para pajisjes elektronike të votimit për të shënjuar në ekranin me prekje (touchscreen) partinë dhe kandidatin e preferuar. Ishte vetë kryekomisioneri, i cili mori pjesë në testimin e pajisjes. Në vend të partive politike në fletën e votimit ishin skuadrat e futbollit, ndërkohë në vend të kandidatëve ishin vendosur futbollistët. Në testimin e fundjavës u bë aplikimi i të gjitha risive të këtyre zgjedhjeve. Në Njësinë Nr. 10 në kryeqytet ku do të aplikohet si identifikimi elektronik, ashtu edhe votimi e numërimi elektronik, votuesi paraqitet vetëm me mjetin e identifikimit biometrik. Ai kalon kartën e identitetit te pajisja e identifikimit elektroni dhe në këtë moment, në ekranin që ndodhet përpara komisionerëve të qendrës së votimit, shfaqet një foto e votuesit, e cila nuk është e njëjtë me foton e kartës së identitetit. Nëse komisionerët konfirmojnë që personi që ka kaluar mjetin e identifikimit te pajisja është i njëjtë me personin që paraqitet në qendrën e votimit, atëherë votuesit i jepet mundësia që me shenjën e gishtit të firmosë atë që quhet fleta e votimit. Aparatura do të printojë një letër që mban edhe firmën me shenjat e gishtërinjve të votuesit, që e dorëzon te komisionerët dhe më pas drejtohet për në dhomën sekrete të votimit, ku në Njësinë 10 në Tiranë do të jetë një pajisje që do bëhet votimi elektronik.
VOTIMI Pasi dorëzon te komisioneri kuponin e printuar nga makineria e identifikimit elektronik, komisioneri i jep akses votuesit që të votojë te pajisja. Në ekranin e pajisjes do të shfaqen logot e partive me emërtimin e tyre dhe në krah të tyre një rreth i vogël ku do duhet të prekin votuesit. Pasi shtyp rrethin e partisë së preferuar, votuesi do duhet më pas të shtypë në ekran në vendin ku lexohet “Konfirmo”. Pas këtij hapi, në ekran do të shfaqen numrat, që nënkuptojnë kandidatët e partisë së zgjedhur në atë qark. Votuesi do të përzgjedhë kandidatin e preferuar përmes numrit dhe do të shtypë sërish verifiko dhe pret derisa votimi konfirmohet. Gjatë këtij testimi u vu re se teknologjia shkurton si kohën e votimit, ashtu edhe atë të numërimit, madje brenda 30 minutash. Siç tha Celibashi, më 25 prill, në Njësinë Nr. 10 në Tiranë mësohet rezultati i zgjedhjeve. “Teknikisht, kjo është e mundur, pasi në një kohë prej 30 minutash ose 1 orë e kemi rezultatin zgjedhor. Jemi duke diskutuar dhe duke u konsultuar me partitë politike, për të vendosur nëse do të ishte e dobishme që rezultatin ta shpallnim në momentin e parë sapo makina na e bën të ditur apo të presim pak kohë më shumë, pasi dikush mendon që rezultati që do të marrin nga Njësia 10 mund të afektojë jo mirë në procesin e numërimit. Nga pikëpamja teknike mund të shpallet menjëherë”, u shpreh Celibashi.