Paratë për riparimet pas tërmetit, ja afatet e reja
Shtyhet afati i ankimimit për vlerësimin e dëmit nga një javë në një muaj
Të pakënaqurit me masën e vlerësimit të dëmit të shkaktuar nga tërmeti në banesat e tyre nuk do të kenë më vetëm një javë kohë për ta ankimuar, por një muaj.
Ky lëshim, që në dukje është në interes të qytetarëve, vetëm sa i jep kohë Bashkisë së Tiranës të argumentojë ekspertizën.
VENDIMI Udhëzimi i mëparshëm parashikonte që bashkia shqyrton ankimin, vendos dhe njofton aplikantin ankimues brenda 7 ditëve pune nga data e depozitimit të kërkesë-ankesës. Por pas shkresave të shumta me aplikime për rishqyrtim të adresuara pranë pushtetit vendor, çka thuhet të kenë penguar vijimin e procedurës për ndarjen e granteve, Bashkia ka vendosur që afati maksimal i shqyrtimit të ankesave të ndryshohet në 30 ditë që nga data e njoftimit nga aplikuesi. “Me qëllim mbrojtjen e interesave të subjekteve, banesat e të cilave janë dëmtuar nga tërmeti i datës 26.11.2019, në mënyrë që të jenë subjekte përfituese nga nënprogrami i grantit të rikonstruksionit dhe programi i rindërtimit, u vlerësua si e nevojshme propozimi i ndryshimit në vendimet për miratimin e udhëzuesve “Për detajimin e procedurave për të përfituar nga nënprogrami i grantit të rikonstruksionit dhe nga programet e procesit të rindërtimit”. I propozojmë Këshillit Bashkiak, në cilësinë e organit vendimmarrës, miratimin e projektvendimit “Për një ndryshim dhe shtesë në udhëzuesit për detajimin e procedurave për të përfituar nga nënprogrami i grantit të rikonstruksionit dhe programet e procesit të rindërtimit”, në të cilin afati aktual i shqyrtimit të ankesave të ndryshohet dhe të bëhet 30 (tridhjetë) ditë kalendarike nga momenti i njoftimit të aplikuesit/përfituesit”, citohet në relacionin e projektvendimit të nisur për miratim në Këshillin Bashkiak. Përgjatë një viti e gjysmë, që kur nisi procedura për ndarjen e parave për rikonstruksione a riparime, ka pasur mosmarrëveshje midis qytetarëve që nuk pajtoheshin me dëmin e vlerësuar nga ekspertët e pushtetit vendor a Institutit të Ndërtimit. Njëjavëshi për ankimimin ka zvarritur edhe më procesin, ndërsa me afatin e ri, me gjasë, ndarja e grantit të rikonstruksionit shtyhet pambarimisht. Deri tani mijëra familje kanë marrë në dorë paratë për dëmin e kategorizuar nga shkalla DS1 deri në DS4, që parashikon dëme të lehta si çarje muresh e deri tek ato më të rëndat në strukturë. Masa e vlerësimit varion nga 100 deri në 500 mijë lekë të rinj. Ndonëse një pjesë e mirë e qytetarëve i kanë bërë punimet me kohë, e kanë përfituar masën që iu takon.