Humbi 110 milionë euro në gjyq me Becchettin, Rama: Do të marrë atë që nuk thuhet
Zbardhet vendimi i arbitrazhit me deklaratat publike të Kryeministrit kundër biznesmenit italian të “Agon Channel”
Ndonëse arbitrazhi i ka dhënë të drejtë biznesmenit italian Francesko Beccheti, Kryeministri Edi Rama insiston me deklarata publike kundër tij.
Ndonëse deklaratat publike të bëra nga kreu i qeverisë vite më parë kundër Becchettit janë përdorur në gjyqin e arbitrazhit dhe kanë ndikuar në gjobitjen e Shqipërisë. I irrituar dje, kreu i qeverisë ka sulmuar biznesmenin italian, Presidentin Meta dhe ish-Kryeministrin Berisha. Këta dy të fundit Rama i akuzoi se janë gëzuar për gjyqin që humbi Shqipëria me pronarin e “Agon Chanel”, ndërsa për këtë të fundit kreu i qeverisë, ndonëse nuk e di se si, por shprehet me bindje se nuk do t’i japë asnjë lekë Becchetit. “Dy njerëzit më të gëzuar për një gjyq që ne e humbëm, pasi kemi fituar tre të tjerë me një marifetçi të paskrupullt, që ju këtu në Tepelenë e njihni mirë, ishin po këta, Ilir meta dhe Sali Berisha. Një gëzim i neveritshëm e në ndërkohë, një përpjekje po kaq e neveritshme për të nxitur e për të motivuar ata, të cilët janë ndjekësit e tyre me sytë dhe me veshët top, por me mendjen tapë nga dokrrat, broçkullat dhe helmi i tyre, duke arritur të shpërndajnë edhe trakte lart e poshtë, natën, nëpër Tiranë, se tani shqiptarët do paguajnë nga xhepi një gjobë 110 milionë. Unë nuk mund t’i them si e qysh, unë mund t’i them vetëm kaq, që ai marifetçiu, bashkë me Ilirin dhe Saliun do marrin atë që nuk thuhet, do marrin atë që nuk hahet, që mbetet por nuk hahet, asgjë tjetër nuk kanë për të marrë nga xhepi i shqiptarëve dhe nga Shqipëria, sepse lufta kundër atij marifetçiu të paskrupullt vazhdon. Ai është një i kërkuar nga drejtësia shqiptare e nuk kemi për ta lejuar t’i fusë duart në xhepin e shqiptarëve”, tha Rama gjatë takimit me socialistët në Tepelenë.
ZBARDHET VENDIMI Por, teksa kreu i qeverisë Edi Rama bën deklarata publike kundër biznesmenit italianë që mund të dëmtojnë financiarisht sërish Shqipërinë, “News 24” ka zbardhur vendimin e arbitrazhit, i cili i dha të drejtë biznesmenit Francesco Becchetti dhe ortakëve të tij për mbylljen e “Agon Channel” nga ana e autoriteteve shqiptare. Në vendim thuhet shprehimisht se, për çdo vit vonesë, pala shqiptare duhet të paguajë interesa financiare që llogariten duke pasur parasysh normën bazë të interesit të bursës së Londrës, që quhet LIBOR plus 3% çdo vit. Si referencë për nisjen e interesave është 31 marsi i 2018, dhe kjo procedurë do të zgjasë deri kur të shlyhet e gjithë shuma. Bazuar në këto të dhëna deri tani qeveria shqiptare ka akumuluar interesa rreth 14,7 milionë euro të tjera. Fatura e arbitrazhit nga 108 milionë euro, ka shkuar ne 122,7 milionë euro. Po të merret parasysh që edhe për 2021 nuk ka ndonjë plan për të bërë pagesa kundrejt Becchettit dhe ortakëve të tij, detyrimi pritet të rritet të paktën me 4 milion euro të tjera e për t vazhduar kështu çdo vit. Konkretisht në vendim thuhet se për Francesco Becchettin dhe 2 ortakët e tij do të përfitojnë si dëmshpërblim duke llogaritur interesat plot 100 milionë euro. Mauro De Renzis do marrë 46,7 milionë euro, Stefania Grigolo rreth 11,7 milionë euro dhe Francesco Becchetti, 41 milionë. Rreth 8 milionë euro të tjera janë shpenzime gjyqësore, ekspertë dhe dëshmitarë, ndërsa mbi 600 mijë dollarë të tjera kushton arbitrazhi. Përveç veprimeve konkrete që kanë bërë autoritetet shqiptare për mbylljen e “Agon Channel”, arbitrazhi ndërkombëtar ka administruar si prova dhe deklaratat publike të Kryeministrit Rama kundrejt biznesmenit italian Francesco Becchetti, që i cilësonte paratë e investitorit italian si të pista.
PROCESI Qendra Ndërkombëtare për Zgjidhjen e Mosmarrëveshjeve të Investimeve rrëzoi ankimin e qeverisë shqiptare, duke dënuar vendin tonë me 110 milionë euro. Kjo shumë do t’i jepet biznesmenit italian, Francesco Becchetti, si dëmshpërblim për mbylljen e padrejtë të televizionit në pronësi të tij në vitin 2015. Autoriteti në të cilin u paraqit ankimi i qeverisë shqiptare e ka vlerësuar të padrejtë pretendimin për të rrëzuar vendimin e gjykatës së Strasburgut duke e lënë atë përfundimisht në fuqi. Përpjekja e qeverisë shqiptare për të anuluar dënimin me 110 milionë euro gjobë në procesin e hapur nga biznesmeni italian, Francesco Becchetti, ka dështuar. Qendra Ndërkombëtare për Zgjidhjen e Mosmarrëveshjeve të Investimeve (ICSID) një gjykatë arbitrazhi, pjesë e Bankës Botërore, e dënoi Shqipërinë në prill të vitit 2019 me 110 milionë euro, duke gjykuar se mbyllja e televizionit ishte “motivuar politikisht”. Ky dënim përfaqëson vlerën më të lartë me të cilën Shqipëria është dënuar nga një gjykatë arbitrazhi. Autoritetet shqiptare reaguan duke kërkuar anulimin e vendimit të marrë, ndërsa vetë kryeministri Edi Rama, shpjegoi se Shqipëria nuk ishte dënuar dhe se vendimi nuk ishte përfundimtar. Në gusht të vitit 2019 Qendra Ndërkombëtare për Zgjidhjen e Mosmarrëveshjeve të Investimeve pranoi ankimimin duke urdhëruar pezullimin e përkohshëm të ekzekutimit të vendimit të saj. Ky apelim është një formë e jashtëzakonshme rekursi e parashikuar në mbrojte të parimeve themelore juridike që lidhen më një proces. Kërkesa e palës shqiptare, u bazua te pretendimi për shkelje të procedurave gjatë procesit të arbitrazhit, por Komisioni Ad-Hoc i ngritur për shqyrtimin e rastit, nuk e ka gjetur të drejtë pretendimin e palës shqiptare, e cila do të duhet tanimë të paguajë dëmshpërblimin prej 110 milionë eurosh. Për t’u përfaqësuar në procesin e ankimimit, Avokatura e shtetit shqiptar kishte përzgjedhur studion amerikane, Foley Hoag, me një eksperiencë në trajtimin e rasteve të ngjashme. Ndërsa në anën tjetër sipërmarrësi italian Becchetti, përfaqësohej nga dy studio të mëdha ligjore, “Debevoise & Plimpton”, me seli në New York, dhe “Quinn Emanuel Urquhart & Sullivan”, me seli në Paris dhe New York.
Në vendim thuhet shprehimisht se, për çdo vit vonesë, pala shqiptare duhet të paguajë interesa financiare që llogariten duke pasur parasysh normën bazë të interesit të bursës së Londrës, që quhet LIBOR plus 3% çdo vit. Si referencë për nisjen e interesave është 31 marsi i 2018, dhe kjo procedurë do të zgjasë deri kur të shlyhet e gjithë shuma. Bazuar në këto të dhëna, deri tani qeveria shqiptare ka akumuluar interesa rreth 14,7 milionë euro të tjera. Fatura e arbitrazhit nga 108 milionë euro, ka shkuar ne 122,7 milionë euro.