Qeveria dhe organet drejtuese të “Albcontrol”, duhet të vlerësojnë me seriozitet dhe shumë kujdes kërkesat e kontrollorëve, për gjetjen e zgjidhje të drejtë, ku para së gjithash primar duhet të jetë garantimi i sigurisë së fluturimeve në hapësirën ajrore

Presidenti Ilir Meta u përfshi dje në debatet pas pezullimit të fluturimeve në Aeroportin e Rinasit, për shkak të bllokimit të punës nga kontrollorët e trafikut ajror.

Kreu i shtetit, dje nga Vlora i kërkoi Kryeministrit që të reflektojë dhe të gjejë një zgjidhje sa më të shpejtë të këtij problemi mjaft të rëndësishëm për shtetit shqiptar. Nga ana tjetër, Meta deklaroi se ndërprerja e punës për monitorimin dhe kontrollin e trafikut ajror nga kontrollorët e “Albcontrol” nuk është zgjidhje e problemit të tyre, pasi sipas tij, siguria e hapësirës ajrore në Republikën e Shqipërisë, është çështje e sigurisë kombëtare. Me tone të ashpra, Presidenti u kërkoi të rikthehen në punë për të përmbushur detyrën e tyre, pasi problematika që sjell ky vendim i tyre është i madh për vendin tonë. Meta tha se kjo grevë ishte paralajmëruar, por asnjë prej institucioneve nuk i mori parasysh kërkesat e tyre, duke kritikuar qeverinë për papërgjegjshmëri, por edhe punonjësit për veprimin e tyre të nxituar për shkak të rëndësisë që ka detyra e tyre. Për Presidentin, zgjidhje e vetme e këtij problemi bëhet me dialog, por pa ndërprerë për asnjë moment punën në Aeroportin e Rinasit. Qëndrimi i Presidentit dhe kërkesat e tij drejtuar punonjësve të “Albcontrol” dhe qeverisë u komentuan nga Kryeministri Edi Rama, i cili e akuzoi atë si një prej organizatorëve të kësaj greve, pasi ajo erdhi pas takimit të tij me disa përfaqësues të tyre. MESAZHI I METËS “Kam kërkuar zyrtarisht që organet drejtuese dhe qeveria t’i japin zgjidhje përmes dialogut në përputhje me rregullat dhe duke iu referuar praktikave më të mira të vendeve fqinje.

Presidenti më 2 prill kërkon marrjen e masave për zgjidhjen e situatës, Ministrisë së Transportit. Ministrja nuk angazhohet për të zgjidhur situatën, por për të shantazhuar më tej kontrollorët dhe duke nisur procedurat e shkarkimit të disa prej tyre. Pas nisjes së disa shkarkimeve kanë filluar dhe largimet në masë nga puna. Kam një pyetje për ministren e Transportit që sot doli për të provokuar dhe akuzuar Presidentin e Republikës. Si shpjegohet që për 10 muaj me radhë për një çështje të sigurisë kombëtare nuk gjete kohën të takoheshe me kontrollorët? Si shpjegohet që ato letrat për koncesionin e

Aeroportit të Rinasit, i bëre për një ditë?

‘Albcontrol’-i ka një llogari financiare në ‘EuroControl’, në të cilën derdhen të ardhurat, nëse ka ndonjë problem në bllokimin e një llogarie të tillë duhet të jepet arsyeja dhe duhet punuar për gjetjen e një zgjidhjeje të pranueshme. Në këtë moment delikat dua të shpreh keqardhjen time për veprimin e atyre kontrollorëve, qoftë të atyre që janë provokuar, qoftë të atyre që janë larguar nga puna, por në radhë të parë dua t’i bëj thirrje Kryeministrit në detyrë t’i thërrasë mendjes, sepse nuk mund të bëhen lojëra të tilla në një moment të tillë për gjithë arsyet që përmenda dhe nuk jemi në Amerikën Latine të para disa dekadave, prandaj unë nuk e humbas durimin dhe nuk shqetësohem nga provokimet e qëllimshme që bëhen, të cilat në fakt kanë vetëm një problem, dramën e zgjedhjeve pluraliste që një mendje e marrë përjeton për ato që do të vijnë, të cilat do të bëhen dhe nuk e luan topi. Edhe njëherë dua t’i siguroj të gjithë qytetarët tanë që janë shqetësuar, që janë cenuar, që janë dëmtuar për shkak të kësaj situate, që Presidenti ka qenë është dhe do të jetë gjithmonë për të gjetur zgjidhjen më të drejtë, më të arsyeshme. Gjithmonë u ka thënë dhe iu thotë kontrollorëve, edhe tani, qëndroni në detyrë dhe qëndroni sa më të qetë, sepse ju duhet të jeni aty pa asnjë lloj stresi se kështu ua kërkon puna, është standard europian, ndërkombëtar. Çdo padrejtësi apo e drejtë e mohuar ju garanton Presidenti, si garant i vazhdimësisë së shtetit edhe pas ndryshimit të pushtetit, kuptohet përmes votës së popullit çdo gjë do plotësohet. Në qoftë se qeveria jep zgjedhje sot dhe jep zgjidhje të arsyeshme e shkëlqyer fare kjo gjë, është mrekulli, do duartrokasim dhe për kryeministrin në detyrë sepse çdo reflektim që është në interesin e qytetarëve, që është në interes të parandalimit të situatave më të pakëndshme edhe për qytetarët, edhe për vendin, jemi të detyruar ta duartrokasim”, deklaroi Meta dje në Vlorë.