Me “Coronavac”, Hungaria gati të hapet, ndërsa Kili po përjeton valën e tretë
Me çerekun e popullsisë së vaksinuar me të paktën një dozë, i pari shtet i Bashkimit Europian që u hapi derën vaksinave kineze “Coronavac” tanimë ka vendosur të hapë ekonominë duke hapur dyqanet dhe gjithë shërbimet e tjera. Ky vendim erdhi të mërkurën, ndonëse disa ekspertë shëndetësorë i sugjeruan të kishte kujdes, pasi numri i rasteve dhe viktimave ishte më i larti qëkurse u shpall pandemia. Autoritetet kanë raportuar 311 vdekje të lidhura me koronavirusin më 7 prill, duke e çuar në 22 400 totalin e viktimave me këtë virus. Situatë po aq problematike paraqitet edhe në Kili, që renditet në krye të listës botërore për vaksinimet. Madje, në studimin e fundit të publikuar dje mbi efikasitetin e vaksinës kineze nënvizohet se doza e parë nuk mbron. Studimi nga Universiteti i Kilit zbuloi se injektimi ishte vetëm 56.5% efikas, por vetëm dy javë pas marrjes së dozës së dytë dhe 27.7% fill pasi janë marrë të dyja dozat. Por me një dozë efikasiteti ishte vetëm 3%, në të njëjtin nivel me marzhin e gabimit. Studiuesit
vërejtën efektin e kombinuar të “Coronavac”, i cili përbën rreth 93% të dozave të administruara dhe vaksinën “Pfizer”. E para, ishte në përputhje me studimin e bërë në Brazil, vetëm 54% efikasitet, ndërsa “Pfizer” vlerësohet me 94%. Të dyja vendet po përballen me rritje të madhe të infeksioneve të reja që tejkalojnë mesataren e valës së parë të vitit të shkuar. Hungaria ka regjistruar gati 700 000 infektime prej shpërthimit të pandemisë, me më shumë se 12 000 pacientë ende nëpër spitale, dhe mbi 1 400 nëpër ventilatorë. Ndërsa Kili nga muaji shkurt e deri tani injektoi nëntë milionë doza. Por në vend të uljes së rasteve ditore, ndodhi e kundërta. Vetëm brenda një dite u regjistruan mbi shtatë mijë raste ditore, çka çoi në mbushjen tej kapaciteteve në spitale dhe bllokim të vendit. Hungaria e mbështet hapjen vetëm te shpresa e uljes së rasteve dhe në asnjë argument shkencor. “Shpresojmë se do të ketë rënie të lakores në të ardhmen, të dhënat na japin shpresë, mirëpo shifrat janë ende shumë të larta”, deklaroi të mërkurën shefja mjekësore në Hungari, Cecilia Muller. Si Kili, dhe Hungaria kanë aplikuar vaksinën kineze “Coronavac”, por efekti dhe rrugëtimi që po ndjekin është katërçipërisht i kundërt.