Inter për notën 10, LU-LA e udhëheq drejt titullit
Ronaldo dhe Dibala, Juve mund Napolin dhe fut Milanin nën presion
I pandalshëm! Inter ka nisur marshimin drejt titullit të Serisë A dhe dje koleksionoi fitoren e dhjetë radhazi.
Zikaltrit e drejtuar nga Konte janë bërë të pandalshëm dhe po shkojnë të sigurt drejt triumfit këtë sezon. Sasuolo ishte skuadër e dhjetë radhazi që del me humbje nga përballja me makinerinë e golave, kryesuar nga dyshja “LULA”. Interi arriti të mposhtë Sasuolon me rezultatin 2-1 dhe thellon kështu në 11 pikë diferencën me Milanin ndjekës, duke zbehur dukshëm mundësitë e përmbysjes së këtij klasifikimi, me gjithë ndeshjet e shumta që kanë mbetur deri në fund të kampionatit. Zikaltrit u treguan cinikë këtë ndeshje. Një lojë me kujdes në prapavijë, duke mos lejuar hapësira dhe në çdo moment, duke kundërsulmuar miqtë që kishin zotërim të lartë topi, por “shterpë” dhe pa sjellë rreziqe në portën e Handanoviç. Pikërisht me një prej kundërsulmeve, ishte Lukaku i cili zhbllokoi këtë ndeshje. Lautaro Martinez pason saktë në mesfushë për Eshli Jang, i cili me një zbritje të shpejtë nga e majta harkon në qendër të zonës duke gjetur saktë sulmuesin belg, i cili me kokë e dërgon sferën në rrjetë. Vetëm 10 minuta lojë dhe zikaltrit marrin atë që duan. Avantazhin dhe qetësinë për të administruar. Deri në fund rastet nuk mungojnë, por pa rezultat dhe drejt dhomave të zhveshjes Interi shkon me triumfin 1-0. Në pjesën e dytë ishte sulmuesi tjetër, argjentinasi Lautaro Martinez, i cili pas një topi të gjatë të Lukakut, çoi shifrat në 2-0 për zikaltrit. Inter krijon të tjera raste, por nuk ia del të “vrasë ndeshjen”. Kur sfida po i afrohej fundit, sulmuesi i Sasuolos, Traore, ngushtoi shifrat në 2-1 në minutën e 85’-të të takimit.
Këta të fundit shtuan ofensivën në fund, por pa rezultat. Sançez ka shansin e artë ta çojë në 3-1, por pasi kalon mbrojtësit dhe portierin me një parabolë, e çon sferën mbi traun e portës. Por vetëm kaq, pasi zikaltrit arritën të triumfonin dhe fitojnë kështu një ndeshje shumë të rëndësishme që i afron me një hap drejt titullit të Serisë A.
JUVE-NAPOLI Më në fund pak qetësi te Juventusi! Bardhezinjtë kanë mposhtur Napolin me rezultatin 2-1, duke marrë kështu vendin e tretë në renditje. Ishte ndeshja e prapambetur mes këtyre dy skuadrave që u zhvillua dje për të barazuar ndeshjet e të gjithë skuadrave në Serinë A. Pas këtij takimi, Juve gjendet në vend të tretë me 59 pikë, 1 më pak se Milani i vendit të dytë. “Zonja e Vjetër” zhvilloi një ndeshje shumë të mirë, teksa krijoi disa raste të pastra për shënim. Në minutën e 13’-të Ronaldo zhbllokoi sfidën, pas një veprimi shumë të bukur të Kiezës në të djathtë. Një driblim ndaj Hysajt dhe sfera te portugezi që finalizon saktë për të zhbllokuar ndeshjen. Gol i cili mjaftoi për fraksionin e parë të lojës. Pjesa e dytë nisi përsëri me Juventusin më kërkues, që gjen golin e dytë në minutën e 73’-të. Ishte Dibala, i cili 4 minuta pasi ishte futur në fushë, ia doli të shënojë për vendasit. Insinje rihapi sfidën në minutën e 90’-të, duke shënuar nga penalltia, por vetëm kaq, pasi skuadra e Gatuzos nuk ia doli të shënojë të paktën edhe një gol tjetër, për të marrë barazimin.