Ushtria merr kontrollin e Rinasit para zgjedhjeve, prapaskenat e përplasjes dhe pse u përfshinë Rama e Meta
Kontrollorët e trafikut ajror kishin vënë në dije Kryeministrin Rama që në 22 shkurt, por pa përgjigje
Aeroporti i Rinasit që dje është i bllokuar, duke pamundësuar uljen dhe ngritjen e avionëve. Ky pezullim erdhi për shkak të një proteste të 68 kontrollorëve të trafikut ajror të “Albcontrol Sh.a.”, të cilët kërkojnë rikthim të pagave në nivelin e para pandemisë dhe ndërprerjen e procedurës së shkarkimit për dy prej kontrollorëve.
Protesta shkaktoi anulimin e 13 fluturimeve në Rinas, ndërkohë që aeroporti është i bllokuar të paktën deri mesditën e së enjtes. Ministrja Balluku, e cila e ka drejtuar “Albcontrol” në vitet 2013-2018 pretendoi se pagat nuk mund të financoheshin nga buxheti dhe se ulja kishte ardhur si pasojë e uljes së trafikut ajror për shkak të pandemisë. Balluku deklaroi se kompania ishte detyruar të ulte pagat e punonjësve për shkak se të ardhurat e kompanisë kanë rënë si pasojë e pandemisë. Ajo e shpalli grevën “një grusht shteti”, ndërsa i deklaroi rrogat e punonjësve të kompanisë (4,400 dollarë në muaj), si shumë të larta. Balluku ka qenë drejtoreshë e kësaj kompanie që nga dita kur socialistët erdhën në pushtet në vitin 2013 dhe deri në ditën kur ajo u bë ministre e Infrastrukturës dhe Energjisë në janar 2019. Ajo nuk ka ngritur ndonjë pretendim për pagat e larta në kohën që drejtoi “Albcontrol”.
NEGOCIATAT Ministrja Balluku pati dje një përpjekje për negocim me kontrollorët edhe për shkak se e ka drejtuar këtë institucion dhe me shpresën se do të arrinte të gjente një zgjidhje të pranueshme nga të gjithë. Por, kjo negociatë dështoi mëngjesin e së mërkurës. Një nga kontrollorët tha dje se Balluku ka mbajtur të njëjtin qëndrim që ka pasur edhe qeveria në 8 vitet e fundit. “E ka personale. Pezullimi i punës do të vijojë. Kam plotësuar skemat e kompetencës, formularin, por kur unë nuk e plotësoj dhe jam e stresuar, gjobitem me 2 milionë lekë të vjetra. Dorëzova deklaratën. Zgjidhja e kontratës së punës, duhet të paraqitem për këtë zgjidhje dhe nëse unë kam pretendime. Pata diskutim vetë, nuk e quaj shkarkim tha, por mund të ulem më mbrapa. Kemi kërkuar ta heqë këtë pikë”, tha një kontrollor tjetër.
SI NISI KRIZA Pezullimi i punës nga kontrollorët e trafikut ajror në Rinas ishte paralajmëruar një muaj më parë, kur Sindikata e Pavarur e Kontrollit Ajror ka pasur korrespondencë thuajse me të gjithë institucionet, por edhe me Kryeministrin Edi Rama. Po ashtu, mësohet se kjo sindikatë ka pasur komunikim 3 herë me Ramën. Ndër të tjera, edhe Sindikata Europiane i është drejtuar Kryeministrit me letra informuese, ku shkruante se situata e uljes së pagave është e paprecedentë, pasi iu ka shtuar punonjësve stresin në punë. Ndërkohë që, thuhet se vendimi për uljen e pagave ishte marrë më 29 dhe efektet financiare të tij kanë nisur që në datën 1 prill. Vendimi në fjalë ishte marrë pa asnjë konsultim me sindikatën, ndërkohë që “Albcontrol” kishte marrë financim 50% nga “EuroControl”. Me grevën e 65 kontrollorëve të “Albcontrol” është pezulluar puna në Rinas, duke ndërprerë kështu fluturimet hyrëse dhe dalëse nga i vetmi aeroport ndërkombëtar që ka vendi ynë.
LETRA I nderuar zoti Kryeministër, Në vijim të letrave të 2 letrave drejtuar nga ATCEUC (Sindikata europiane e trafikut ajror) dhe letrës informuese të datës 19 qershor të Sindikatës së Pavarur të Kontrollit të Trafikut Ajror, kjo është letra e radhës drejtuar shkëlqesisë tuaj z. Kryeministër.
Zoti Kryeministër, ende nuk e dimë nëse jeni në dijeni mbi problematikën dhe kronologjinë e ngjarjeve në “Albcontrol SH.A.”.
Më datë 24.04.2020, Këshilli Mbikëqyrës i Shoqërisë “Albcontrol SH.A.” ka marrë vendimin numër 1, me titull “Për uljen e pagave të punëmarrësve dhe pezullimin e të drejtave të fituara me kontratën kolektive të punëmarrësve të “AlbControl SH.A.” për një periudhë të pacaktuar, deri në kthimin në normalitet të situatës financiare të shoqërisë”. Ky vendim i është njoftuar Kontrollorëve të Trafikut Ajror, individualisht, më datë 29.04.2020, ndërsa efektet financiare të vendimit kanë filluar që nga data 01.04.2020.
Kjo vendimmarrje është bërë pa asnjë konsultë me sindikatën e kontrollorëve duke i vënë para faktit të kryer që në muajin e parë të pandemisë. Menjëherë i kemi kërkuar takim drejtorit të Përgjithshëm z. Mina Kusta. Në takim na është thënë që ky vendim është marrë se nuk kemi mundësi financiare. Na duhet t’ju informojmë se “Eurocontrol”
ka financuar 50% të të ardhurave të shoqërisë “AlbControl SH.A.”, financim që bën të mundur vazhdimësinë normale të pagesës së pozicioneve esenciale të punës, praktikë e zbatuar në të gjitha qendrat e trafikut ajror në Europë.
Gjatë gjithë kësaj periudhe nëpërmjet “e-maile”-ve dhe letrave drejtuar z. Kusta, jemi munduar të ofrojmë mundësi për marrëveshje dhe zgjidhje, por në asnjë rast nuk kemi marrë përgjigje.
Me anë të shkresave u jemi drejtuar Ministrisë së Transporteve dhe Ministrisë së Financave dhe Ekonomisë, por sot e kësaj dite nuk kemi asnjë përgjigje për to.
Zoti Kryeministër, na duhet t’ju informojmë se gjendja mendore dhe stresi në radhët e kontrollorëve të trafikut ajror ka arritur kulmin duke vënë në rrezik tepër të lartë garantimin e sigurisë për të gjithë linjat ajrore.
Përpos uljes së paimagjinueshme të pagës që vazhdon që prej 1 prill 2020, stresin dhe ankthin po e shton së tepërmi refuzimi i çdo letre dhe kërkese duke na futur në një rreth vicioz ku nuk shohim zgjidhje. I nderuar zoti Kryeministër, Në kushtet e një page kaq të papërfillshme, krahasimisht me llojin e punës së kryer nga kontrollorët e trafikut ajror, e gjejmë të vështirë të vijojmë të kemi interes ekonomik për të vijuar këtë marrëdhënie punësimi. Në rast, sikurse shpresojmë se vendimi i Këshillit Mbikëqyrës nuk do të shfuqizohet dhe pasojat e tij do të revokohen, do të ndihemi të shtrënguar të procedojmë me mjete dhe forma që zëri ynë të dëgjohet.
Prej disa muajve, një pjesë e madhe kontrollorësh po shqyrtojnë mundësi të tjera për punësim brenda dhe jashtë vendit.
Sjellim në vëmendjen tuaj se në rast të largimit qoftë edhe një pjese të vogël të kontrollorëve të trafikut ajror, për më tepër që një nga prioritetet e qeverisë shqiptare janë hapja e aeroportit të Kukësit dhe atij të Vlorës, shoqëria “Albcontrol Sh.A.” nuk do të jetë në gjendje të përmbushë misionin e saj në anën sasiore, (mungesë e burimeve të mjaftueshme njerëzore për administrimin e hapësirës ajrore) ashtu edhe në anën cilësore (pamundësi për të respektuar kërkesat në lidhje me sigurinë e fluturimeve në hapësirën ajrore). Në një hipotezë të tillë hapësira ajrore e Republikës së Shqipërisë do të konsiderohej jo e sigurt dhe për pasojë i gjithë trafiku ajror mbi hapësirën ajrore do të ndalohej plotësisht me pasojë pezullimin e të gjitha fluturimeve me destinacion aeroportin e Rinasit dhe shmangien e të gjitha fluturimeve ajrore nga korridoret ajrore të kalimit. Argumenti dhe gjendja e përshkruar më sipër do të ishte e vlefshme dhe për trafikun ajror ushtarak, pasi edhe ky i fundit administrohet nga kontrollorët e trafikut ajror të “Albcontrol Sh.A.”. Sikurse është lehtësisht e kuptueshme. pasojat e një kolapsi të tillë të trafikut ajror do të ishin të pallogaritshme për një vend anëtar të NATO-s dhe që pret çeljen e negociatave të anëtarësimit në Bashkimin Europian.
Gjejmë rastin për të kërkuar urgjentisht një takim me Ju zoti Kryeministër, pasi kemi konsumuar të gjitha shkallët informuese lidhur me shqetësimet e parashtruara më lartë. Zoti Kryeministër, jemi besimplotë që me autoritetin tuaj do të bëheni garant për të parandaluar një përshkallëzim të situatës.