Avokati i kontrollorëve: Nuk ka hapësirë ligjore për ndjekje penale

Avokati i kontrollorëve të trafikut ajror në Aeroportin e Rinasit deklaroi dje se kontrollorët nuk kanë asnjë interes të përfshihen sipas tyre në politikën e ditës, ndërsa theksoi se u është shtuar stresi pas deklaratave nga Kryeministri dhe ministrja Balluku për grusht shteti. Këtë deklaratë avokati i punonjësve të “Albcotrol”-it e bëri pas takimit të tyre me ministren e Infrastrukturës dhe Energjisë, Belinda Balluku. Të pyetur për paralajmërimin se ndaj tyre do të merren masa ligjore, kontrollorët thanë se nuk janë në kushtet e braktisjes së detyrës, por që janë në pritje të respektimit të kontratës së tyre të punës. “Çështja e pagës është një nga arsyet, por nuk është kryesorja”, tha avokati i kontrollorëve të trafikut ajror. “E kemi thënë që në fillim që kjo nuk është një grevë, është një detyrim ligjor, në momentin që kontrollorët e trafikut ajror ndihen në kushtet e paaftësisë për të ushtruar në mënyrë të sigurt detyrën, ligjërisht janë të detyruar te deklarojnë paaftësinë e tyre për punë. Shkak është se ndaj dy kontrolloreve që deklaruan se ishin të paaftë për punë, u filluan procedurat e shkarkimit nga puna. Por, procedura ka prodhuar stresin e gjithë kontrollorëve që mendojnë se për shkak të respektimit të dispozitës mund të ndodhë të hiqen nga puna. E në mënyrë solidare edhe të tjerët janë deklaruar se janë të bindur se janë në kushtet e paaftësisë për punë”, tha avokati Kthupi. Sipas tij, nuk është vetëm çështja e uljes se pagës, por një nga arsyet kryesore është ndryshimi i procedurës operacionale, që ka të bëjë me sigurinë që ushtron ky kontrollor dhe sigurinë ajrore të Republikës së Shqipërisë. “S’jemi në kushtet e braktisjes së punës, kontrollorët janë në punë, por nuk ushtrojnë funksionet. Braktisje është të mos shkuarit në punë pa asnjë arsye, respektimi i një detyrimi ligjor parashikon që një kontrollor që është në kushtet e pamundësisë psikologjike për të ushtruar funksionet duhet të njoftojë eprorin, është i shkruar në kodin ajror, është detyrim që ligji ia njeh si detyrim kontrollorëve, mosrespektimi do sillte gjobitjen më pas. Ka dy kërkesa shumë të thjeshta që mund të përmbusheshin me vullnet të mirë, s’janë kërkesa të komplikuara. E para, gjykojmë s’ka hapësirë ligjore për të çuar kontrollorin në ndjekje penale e s’ka asnjë ligj të shkelur, nëse respektimi i ligjit quhet shkelje ligjore, këtu jemi në kushtet e diskutimeve ligjore nuk i zgjidhim dot këtu”, u shpreh avokati Rezart Kthupi.