Ambasadori rus: Mund të ndikojmë në dialog edhe pa marrë pjesë në të
Ambasadori rus në Serbi, Alexander Bocan-Kharchenko, e ka quajtur trillim raportimin se përfaqësuesi i Rusisë do të marrë pjesë në takimin e delegacioneve të Prishtinës dhe Beogradit për dialogun. Megjithatë, ai theksoi se Rusia ka mundësi për të ndikuar në këtë dialog pa marrë pjesë drejtpërdrejt në të, nëse Beogradi është i interesuar. Sipas raportimeve të një dite më parë, delegacionet e Prishtinës dhe Beogradit, të udhëhequr nga Albin Kurti dhe Aleksandar Vuçiç, do të takohen në shtator në Paris në prani të Presidentit francez, Emmanuel Macron dhe përfaqësuesve të SHBA-së dhe Rusisë. “Unë nuk di për një informacion të tillë, më duket një trillim, por
Rusia tashmë është e përfshirë në proces si një anëtare e përhershme e Këshillit të Sigurimit të OKB-së dhe dihet se çdo zgjidhje për problemin e Kosovës është e mundur vetëm përmes Këshillit të Sigurimit dhe nën kujdesin e tij”, tha Kharchenko. Duke ruajtur të njëjtin qëndrim, përfaqësuesi rus në Beograd tha se një zgjidhje e mundshme mund të jetë kryesisht brenda kornizës së asaj që është e pranueshme për Beogradin, duke kujtuar se si Presidenti rus, Vladimir Putin dhe ministri i Jashtëm, Sergei Lavrov, kanë thënë në mënyrë të përsëritur se Rusia mund të mbështesë vetëm një zgjidhje që plotëson interesat e Serbisë dhe të drejtën ndërkombëtare. “Sa i përket dialogut, nuk kam dëgjuar të jetë caktuar ndonjë takim midis Beogradit dhe Prishtinës”, tha BocanKharchenko, duke theksuar se Rusia beson se nuk ka asnjë alternativë ndaj dialogut. Institucionet në Prishtinë, shprehet ambasadori rus, duhet të përmbushin atë që është rënë dakord në Bruksel.