Dialogun me Serbinë e udhëheq Kurti, do të koordinohet me Osmanin
Presidentja takon ambasadorin e SHBA: Do angazhohem në plotni edhe për përfshirjen e opozitës në bisedime
Albin Kurti dhe Vjosa Osmani do të jenë të koordinuar në dialogun politik me Serbinë, ku Kurti do të jetë udhëheqës për palën nga Kosova, duke u këshilluar me Presidenten Osmani.
Zëdhënësi i qeverisë së Kosovës, Përparim Kryeziu, theksoi për REL se aktvendimi i Gjykatës Kushtetuese i vitit 2019 e ka bërë të qartë se kush e udhëheq këtë proces. “Natyrisht, Kryeministri këtë do ta bëjë duke u këshilluar dhe koordinuar me Presidenten dhe duke ndërtuar konsensus nacional e shtetëror në lidhje me dialogun. Kryeministri ka deklaruar disa herë tashmë se do të kërkojë konsensus dhe debat deri në shterim me opozitën për çështje kapitale për vendin dhe dialogu me Serbinë është ndër çështjet kryesore ku do të kërkohet konsensus”, u shpreh Kryeziu.
Vendimi i vitit 2019 nga Gjykata Kushtetuese thotë se qeveria e Kosovës është bartësja e procesit të dialogut me Serbinë. Pas zgjedhjes së Presidentes, Vjosa Osmanit, si dhe kompletimit të institucioneve të larta të Kosovës me përbërjen e re, partnerët perëndimorë të Kosovës janë duke insistuar për rinisjen e dialogut të saj me Serbinë në Bruksel. KOORDINIMI ME AMBASADORIN
AMERIKAN Presidentja e Republikës,
Vjosa Osmani, ka pritur në zyrë të mërkurën ambasadorin e SHBA-së, Philip Kosnett, me të cilin kanë diskutuar për situatën pandemike dhe sfidat që e presin përpara Kosovën. Osmani është zotuar se do të angazhohet në përpjekjet për të siguruar vaksinën, derisa ka përmendur edhe angazhimin në temën e dialogut me Serbinë. Osmani tha se do të angazhohet për një platformë për dialogun, duke përmendur në veçanti konsultimet dhe përfshirjen aktive të opozitës në çështje që janë të rëndësisë së madhe për vendin. “Në takim Presidentja Osmani po ashtu e siguroi ambasadorin Kosnett që do të angazhohet në plotni që të krijojë një platformë të mirëfilltë të dialogut me gjithë spektrin politik, duke cekur që në këtë drejtim theks të veçantë do t’u japë konsultimeve me opozitën si dhe përfshirjen e tyre aktive në çështje të interesit të veçantë për vendin”, thuhet në njoftimin e Presidencës. TAKIMI OSMANI-KURTI
Të mërkurën, më 7 prill, Presidentja e Kosovës Osmani ka pritur në takim Kryeministrin Kurti dhe disa nga drejtuesit e dikastereve qeveritare, ku diskutuan për nevojën e krijimit të mekanizmave të përbashkët koordinues në fushën e politikës së jashtme. “Presidentja Osmani dhe Kryeministri Kurti u pajtuan për bashkërendim të rregullt institucional mes institucioneve kyçe të Republikës së Kosovës në realizimin e synimeve të përbashkëta që lidhen me forcimin e subjektivitetit ndërkombëtar dhe sigurinë kombëtare”, thuhet në njoftimin nga zyra e Osmanit. EDHE BE PËRMENDI
“DETYRAT” Në urimin që Përfaqësuesi
i Lartë i Bashkimit Europian për Politikë të Jashtme, Josep Borrell, i ka shkruar më 5 prill Vjosa Osmanit, pas zgjedhjes së saj Presidente, thuhet se “me institucionet e reja në vend, Kosova mund të përqendrohet vendosmërisht në reformat e nevojshme dhe në dialogun e lehtësuar nga BE-ja”. Ndërsa Kancelarja gjermane, Angela Merkel, e ka uruar Albin Kurtin për zgjedhjen e tij si
Kryeministër më 3 prill dhe i ka përmendur detyrat e rëndësishme dhe të rënda që e presin qeverinë e re, si sundimi i ligjit, luftimi i krimit dhe korrupsionit, përmirësimi i situatës ekonomike dhe veçanërisht, dialogu për normalizim me Serbinë. Presidentja Osmani ka deklaruar se dialogu është rruga që Kosova e ka përpara, por siç ka thënë ajo, “ai duhet të jetë i drejtë dhe i barabartë”.