Siguria e vaksinave kineze? Për ushtarët e stërvitjes së NATO-s, vetëm “Pfizer”

Përparësi do të kenë ata që vuajnë nga sëmundje kronike. Do të njoftohen për vaksinën përmes mjekut të familjes

Në fundjavë procesi i vaksinimit do të nisë edhe për personat mbi 65 vjeç, si edhe ata mbi 60 vjeç që vuajnë nga sëmundje kronike.

Janë mbi 327 persona që i takojnë grupmoshës nga 60 deri në 69 vjeç dhe siç është vepruar me të moshuarit dhe kategoritë e tjera, njoftimi do të bëhet përmes mjekut të familjes. “Presim që gjatë kësaj fundjave të kemi një ulje të moshës në gjithë vendin, pra +65 vjeç dhe +60 ata me sëmundje kronike”, tha ministrja Manastirliu nga Gjirokastra. INJEKTIMI I DOZËS Për vaksinimin e kësaj grupmoshe, do të shërbejnë qendrat e vaksinimit të ngritura posaçërisht për këtë proces. Do të jetë mjeku i familjes që do të dërgojë të dhënat në njësinë vendore dhe operatorin e kujdesit shëndetësor. Këta të fundit do të përcaktojnë kalendarin me vendin, datën dhe orën e vaksinimit, duke vënë në dijeni mjekun e familjes dhe ky i fundit qytetarin. Por ky rregull nuk vlen për moshat mbi 70 vjeç, të cilët mund të paraqiten pranë qendrave të vaksinimit me kartë identiteti dhe të injektojnë dozën e parë. Ky “lëshim” u bë nga qeveria pas rënies së interesit për vaksinën në këto grupmosha.

VAKSINA Në dispozicion janë 4 vaksina, “Pfizer”, “AstraZeneca”, “Sputnik” apo vaksina ruse, si edhe vaksina kineze “Coronavax”. Nga Instituti i Shëndetit Publik është bërë me dije se përzgjedhja e tyre do të jetë rastësore, çka do të thotë se do të injektohet ajo vaksinë që është gjendje. Por kjo ka pak mundësi të ndodhë, sa kohë vaksina të caktuara janë tregtuar për kategori të caktuara. Konkretisht, që pas mbërritjes së më shumë se 38 mijë dozave të vaksinës “AstraZeneca” u tha që do të ishin apo do të shërbenin për vaksinimin e arsimtarëve dhe trupës pedagogjike dhe kështu ndodhi. Procesi vijoi për ta dhe nuk u pezullua as kur u rihap debati për sigurinë dhe efikasitetin e kësaj vaksine. Dozat e mbetura kanë nisur të aplikohen së fundmi për farmacistët. Nga ana tjetër, “Pfizer” ka qenë një vaksinë e dedikuar qysh në fillim për personelin shëndetësor dhe kështu ndodhi. Dërgesat me numër të kufizuar vaksinash janë aplikuar kryesisht për bluzat e bardha dhe së fundmi do të jenë edhe për trupën ushtarake, duke qenë se është një kërkesë e diktuar nga

NATO-ja. Çfarë mbetet për të tjerët duke përfshirë të moshuarit, punonjësit e Policisë, gazetarët janë vetëm vaksina kineze dhe ajo ruse, të dyja të pacertifikuara nga Bashkimi Europian. Jo më larg se dje përmes aeroportit

“Nënë Tereza” ka mbërritur dërgesa e radhës me vaksina kineze. Janë mbi 100 mijë doza, ndërsa në total numri i dozave, duke përfshirë dërgesën e parë dhe të dytë, ka shkuar në 292 mijë. Por cila është ecuria e vaksinimit deri më tani? Sipas të dhënave të Ministrisë së Shëndetësisë, që prej fillimit të vaksinimit janë kryer në total 232 556 doza të vaksinës ndaj COVID-19, nga të cilët janë mbi 162 mijë të moshuar të vaksinuar.