Avokati: Procesverbalet u firmosën me kundërshtime
“Nuk ka ‘shpërdorim detyre’ për punonjës shoqërie anonime”
Avokati i tre kontrollorëve të arrestuar, Armando Fezga, Flora Ndreca, dhe Muhin Mezini, ka folur për mediat para Drejtorisë së Policisë së Tiranës, ku ka thënë se ata i kanë firmosur procesverbalet e ndalimit me kundërshtime. Rezart Kthupi u shpreh se akuza që është ngritur ndaj kontrollorëve është “shpërdorim detyre në bashkëpunim”. Avokati bëri me dije se njëri prej kontrollorëve, Armando Fezga, sapo ka kaluar Covid-in, ndërsa shtoi se si prova nga organi i akuzës janë konsideruar bisedat në një grup “Whatsapp”-i. Ndërkohë që pyetjes se kjo masë u dha me pretendimin se kishte gjasa që kontrollorët të largoheshin nga vendi, avokati kujtoi faktin se avionët nuk punojnë. “Asnjë nga kontrollorët nuk kanë dashur të largohen, është pretendim pasi nuk ka asnjë provë që mund të provohet. Ata kontrollorë kanë qenë këtu të gjithë. Dhe më çfarë do të largohen?! Se avionët nuk punojnë.”, tha ai. “Sapo kanë përfunduar procedurat për njoftimin e ndalimit të tre prej kontrollorëve, Armando Fezga, Muhin Mezini dhe Flora Ndreca. Akuza që komunikohet nga organi hetimor është “shpërdorim detyre” në bashkëpunim. Na është vënë në dispozicion një kopje e procesverbalit, me të cilin është bërë komunikimi i akuzës dhe ndalimi i personit. Zoti Fezga sapo ka kaluar Covid-in, mund të themi se nuk është në kushtet shëndetësore për të përballuar një proces paraburgimi prej 48 orësh. Për sa i përket akuzës, do të ishte koment ligjor, unë personalisht gjykoj që është një akuzë që nuk mund të ngrihet ndaj një punonjësi të një shoqërie anonime. Është një akuzë që mund të ngrihet vetëm ndaj një punonjësi që ushtron një funksion publik në një institucion shtetëror. Është shpërdorim i detyrës shtetërore. Nuk e di me çfarë arsyeje Prokuroria e gjen këtë si vepër penale për të ngritur akuzën. Të gjithë të ndaluarit, procesverbalin që kanë firmosur e kanë firmosur me kundërshtime, me pretendimin se ajo që është e shkruar në procesverbal, si arsye për ndalimin e tyre, është një stisje e asaj që është në realitet dhe është një keqinterpretim i mesazheve në ‘Whatsapp’. Ju kemi vënë procesverbalin në dispozicion, bëjeni vlerësimin vetë, sepse vlerësimi im do të ishte i njëanshëm dhe nuk do të ishte korrekt. Janë komunikime në një ‘chat-grup’, që janë marrë si provë nga ana e organit të akuzës. Komiteti i mbrojtjes civile ka të gjitha të drejtat të ndërmarrë të gjithë hapat e nevojshëm që gjykon për të vendosur atë që konsideron zgjidhje të problemit. Është e vërtetë që ‘Albcontrol’-i është një shoqëri, e cila është me vetëfinancim, por nga ana tjetër është një shoqëri që është në pronësi të Ministrisë së Ekonomisë dhe Energjetikës. Dhe Ministria e Ekonomisë dhe Energjetikës, apo çdo entitet tjetër shtetëror kishte të gjithë mekanizmat e nevojshëm ligjorë për të bërë të mundur financimin, qoftë edhe nëpërmjet huas. Nuk ka asnjë klauzolë ligjore që e pengon ‘Albcontrol’-in në kushtet e garantimit të fondit të pagave, që të hyjë në tregun e lirë dhe të marrë hua. Sikurse ka marrë hua në vitin 2019 për investime, mund të merrte hua edhe për pagat. Pretendimi i Policisë se ata kanë arsye për t’u larguar është thjeshtë një pretendim. Ata kanë qenë këtu që mbrëmë të shoqëruar, edhe të tjerë bashkë me ta dhe nuk janë larguar. Dhe me çfarë do të largohen, se avionët nuk punojnë?”, është shprehur avokati i kontrollorëve para Drejtorisë së Policisë së Tiranës.