Historia e përplasjes së punonjësve të “Albcontrol”, Rama e dinte një vit më parë
Punonjësit e kontrollit të trafikut ajror në aeroportin “Nënë Tereza” nuk protestuan dhe ndërprenë punën pa asnjë paralajmërim. Duke ju referuar kërkesave që Sindikata e Transportit Ajror i ka dërguar kryeministrit Edi Rama,kjo protestë ishte paralajmëruar thuajse një vit më parë dhe tregon se ai ishte në dijeni të problemit të tyre. Sindikata e Pavarur e Kontrollit Ajror ka pasur korrespondencë thuajse me të gjithë institucionet. Në datën 22 shkurt të këtij viti ka pasur një korrespondencë mes tyre dhe kryeministrit Edi Rama. Po ashtu mësohet se kjo sindikatë ka pasur komunikim 3 herë me Ramën. Ndër të tjera edhe Sindikata Europiane i është drejtuar kryeministrit me letra informuese ku shkruante se situata e uljes së pagave është e paprecedentë, pasi iu ka shtuar punonjësve stresin në punë. Ndërkohë që thuhet se vendimi për uljen e pagave ishte marrë më 29 dhe efektet financiare të tij kanë nisur që në datën 1 prill. Vendimi në fjalë ishte marrë pa asnjë konsultim me sindikatën, ndërkohë që Alcontrol kishte marrë financim 50 përqind nga EuroControl. Me grevën e 65 kontrollorëve të “Albcontrol”u pezullua puna në Rinas, duke ndërprerë kështu fluturimet hyrëse dhe dalëse nga i vetmi aeroport ndërkombëtar që ka vendi ynë. “Zoti Kryeministër, na duhet t’ju informojmë se Eurocontrol ka financuar 50% të të ardhurave të shoqërisë Albcontrol sh.a. financim që bën të mundur vazhdimësinë normale të pagesës së pozicioneve esenciale të punës, praktikë e zbatuar në të gjitha qendrat e trafikut ajror në Europë. Nga të gjitha komunikimet që kemi me qendrat e trafikut ajror, jemi e vetmja qendër në gjithë Europën në të cilën aplikohet ulje page në masën 72%. Na duhet t’ju informojmë se gjendja mendore dhe stresi në radhët e kontrollorëve të trafikut ajror ka arritur kulmin duke vënë në rrezik tepër të lartë garantimin e sigurisë për të gjithë linjat ajrore. Në kushtet e një page kaq të papërfillshme, krahasimisht me llojin e punës së kryer nga Kontrollorët e Trafikut Ajror, e gjejmë të vështirë të vijojmë të kemi interes ekonomik për të vijuar këtë marrëdhënie punësimi. Prej disa muajve një pjesë e madhe kontrollorësh po shqyrtojnë mundësi të tjera për punësim brenda dhe jashtë vendit”, thuhet ndër të tjera në letrën e dërguar nga Sindikata Transportit Ajror drejt kryeministrisë.