Rreth 500 mijë euro ndahen për avokatët e të akuzuarve në Hagë
Ministria s’jep detaje mbi pagesat, reagon Avokati i Popullit
Ministria e Drejtësisë në Kosovë ka aprovuar disa kërkesa për mbulimin e shpenzimeve për mbrojtje juridike dhe mbështetje financiare të personave të akuzuar në proceset gjyqësore pranë Dhomave të Specializuara në Hagë.
Mes të akuzuarve në atë institucion janë ish-Presidenti i Kosovës, Hashim Thaçi, ish-kryeparlamentarët Kadri Veseli dhe Jakup Krasniqi, ish-kreu i Grupit Parlamentar të LVV-së, Rexhep Selimi etj. Komisioni, i cili funksionon brenda Ministrisë së Drejtësisë, ka aprovuar kërkesat për katër avokatët mbrojtës të të akuzuarve dhe ka kryer pagesat për ta në vlerë prej 464 600 euro. “Mbulimi i shpenzimeve për mbrojtje juridike dhe financiare bëhet sipas legjislacionit përkatës në fuqi dhe këto të drejta janë të aplikueshme ndaj të gjithë personave të akuzuar potencialë në proceset gjyqësore dhe procedurat e ndërlidhura, për krimet e pretenduara pranë Dhomave të Specializuara, pa marrë parasysh se kush është subjekt i procedurës pranë Dhomave të Specializuara”, thuhet nga zyra për media e Ministrisë së Drejtësisë. Zyrtarët nuk kanë dhënë detaje se sa para është paguar një avokat. Por sipas REL, Avokati i Popullit, Naim Qelaj, tha se Ministria e Drejtësisë duhet të jetë transparente. “Çdo shpenzim nga paraja publike duhet të jetë transparent dhe publik. Nuk kemi se çka të fshehim. Pa dyshim që unë konsideroj se është obligative për institucionet t’i bëjnë publike shpenzimet nga paratë e shtetit”, tha Qelaj. Sipas avokatit, vetëm në raste të caktuara me ligj nuk mund të bëhen publike shpenzimet e parave të shtetit.
Në Institutin e Kosovës për Drejtësi thonë se ligjet e aplikuara në Kosovë nuk lejojnë që pagesat për avokatët të jenë sekrete. Ky proces duhet të jetë transparent dhe të sigurohet që të gjithë të akuzuarit të trajtohen në mënyrë të barabartë. Mënyra se si janë paguar avokatët deri tash, sipas IKD-së, cenon rëndë parimet e transparencës, llogaridhënies dhe mundësisë për të trajtuar në mënyrë të drejtë, të barabartë dhe sipas kushteve të njëjta të gjithë personat e akuzuar.
Ministria e Drejtësisë ka bërë të ditur se buxheti për mbështetje financiare për personat e akuzuar potencialë është përcaktuar me ligj, ku janë paraparë mjete në vlerë prej 17 milionë eurosh. Sipas ligjit, çdo i akuzuar potencial nga Dhomat e Specializuara ka të drejtën për ndihmë financiare dhe mbulim të shpenzimeve të mbrojtjes.
Shumat që kërkohen nga avokatët mbeten konfidenciale, por bazuar në përvojat e mëhershme, bëhet fjalë për miliona euro.
Micheal O’Reilly ka qenë pjesë e ekipit mbrojtës të ishKryeministrit të Kosovës, Ramush Haradinaj, gjatë proceseve gjyqësore në Tribunalin e Hagës për Krimet në ish-Jugosllavi. Në një shkrim për “Irish times”, O’Reilly më 23 maj 2015 kishte shkruar se Haradinaj ka paguar 11 milionë euro për mbrojtjen e tij. “I thash atij se do t’i kushtonte 5 milionë euro për të pasur mbrojtjen që i duhet. Në fakt, i kushtoi 11 milionë euro dhe të gjitha ishin donacion nga populli i Kosovës. I thash atij se ky gjykim do t’ia merrte dy vjet të jetës së tij (edhe jetës sime) në fakt, i mori tetë, katër nga të cilat i kaloi në burg”, kishte shkruar O’Reilly.