“Alb Control”, Meta letër KLSH: Auditimi do zbulojë shkaktarët

“Auditim të plotë mbi mënyrën e menaxhimit të kësaj shoqërie dhe përdorimin e fondeve publike”

Presidenti Ilir Meta i dërgoi dje një tjetër letër Kontrollit të Lartë të Shtetit, ku i kërkon nisjen e procedurave të auditimit mbi veprimtarinë ekonomiko-financiare dhe organizative të “AlbControl”.

Kreu i shtetit i bën me dije kreut të KLSH-së, Arben Shehu, që të nisë sa më parë këtë proces për të zbuluar shkaqet që çuan në lindjen dhe thellimin e problematikave në këtë shoqëri që pasoi me protestën e kontrollorëve dhe pezullimin e punës për 48 orë në aeroportin “Nënë Tereza”. Duke renditur disa nga çështjet që e shqetësojnë lidhur me problematikën e krijuar, Meta i bën thirrje KLSH-së të hetojë mbi mënyrën e menaxhimit, përdorimin e fondeve publike dhe respektimit të kontratave. Sipas Presidentit, pretendimet e kontrollorëve duhet të shqyrtohen dhe sa më parë të gjendet një zgjidhje e këtij ngërçi që ka një rëndësi të madhe për sigurinë kombëtare. PJESË NGA LETRA Zoti Kryetar i Kontrollit të Lartë të Shtetit! Kërkohet nisja e procedurave të auditimit mbi veprimtarinë ekonomiko-financiare dhe organizative të “AlbControl” sh. a., si dhe e shkaqeve që kanë çuar në lindjen dhe thellimin e problematikave në këtë shoqëri. Kompania shtetërore “Albcontrol” sh. a., me kapital 100 për qind shtetëror, ka përgjegjësinë ligjore të menaxhojë dhe kontrollojë hapësirën ajrore shqiptare (FIR) në përputhje me rregullat e brendshme dhe standardet ndërkombëtare të trafikut ajror. Punonjësit e kësaj kompanie (kontrollorët ajrorë shqiptarë), të organizuar në Sindikatën e Pavarur

të Kontrollit të Transportit Ajror, kanë ngritur shqetësimet e tyre mbi vendimmarrjet e këshillit mbikëqyrës të shoqërisë “Albcontrol” sh. a., për uljen e pagave dhe pezullimin e të drejtave të fituara me kontratën kolektive të punëmarrësve për një periudhë të pacaktuar, duke pretenduar se këto vendimmarrje shkelin një sërë rregulloresh dhe manualesh në lidhje me sigurinë e operimit të trafikut ajror, duke vënë rrjedhimisht në rrezik, individualisht dhe kolektivisht, të gjithë trupën e kontrollorëve të trafikut ajror, funksionimin normal të shoqërisë “Albcontrol” sh. a. dhe sigurinë e hapësirës ajrore të Republikës së Shqipërisë. Sipas këtyre të dhënave të bëra tashmë dhe publike prej tyre, përdorimi i fondeve të kompanisë, ndërprerja në masë e marrëdhënieve të punësimit, si dhe kufizimi/pezullimi pa afat i të drejtave të fituara prej tyre, nuk përkon me realitetin financiar të kompanisë dhe as justifikohet nga situata e krijuar për shkak të pandemisë, siç kanë pretenduar organet drejtuese të kompanisë. Lidhur me këto problematika dhe kërkime të përsëritura të kontrollorëve ajrorë, ata pretendojnë se janë injoruar për të paktën 10 muaj me radhë nga institucionet përgjegjëse dhe kërkesat e tyre nuk janë marrë në shqyrtim. Ndërkohë që po prej ditës së djeshme, disa prej kontrollorëve janë shkarkuar nga detyra, ndërsa një numër i konsiderueshëm i tyre janë shoqëruar nga Policia e Shtetit në komisariate. Nisur nga situata tepër e rëndë e krijuar, në mbrojtje dhe garantim të interesit publik, Presidenti i Republikës në mbështetje të nenit 92/h dhe 162 pika 1 dhe 163 shkronja “a” dhe “b” të Kushtetutës, si dhe referuar dispozitave të ligjit nr. 154/2014 “Për organizimin dhe funksionimin e Kontrollit të Lartë të Shtetit”, kërkon nga ana Juaj që të ndërmerret pa vonesë një auditim i plotë mbi mënyrën e menaxhimit të kësaj shoqërie; respektimin e dispozitave ligjore në vendimmarrjet e organeve drejtuese; përdorimin e fondeve publike; respektimin e procedurave në marrëdhëniet e punës; si dhe çdo aspekt tjetër që paraqet rrezik për veprimtarinë e sigurt dhe funksionimin normal e të qëndrueshëm të “AlbControl” sh.a.