Punësimet elektorale, KQZ letër Drejtorisë së Thesarit
Celibashi i kërkon Drejtorisë së Thesarit numrin e të punësuarve muaj pas muaji që nga data 25 dhjetor 2020 kur hyri në fuqi akti
Sa herë që ka zgjedhje në Shqipëri ndodh që administrata publike të fryhet me punonjës që njihen ndryshe edhe si punësime elektorale.
Ky fenomen, sipas kandidatëve të opozitës, nuk u ka shpëtuar edhe këtyre zgjedhjeve. Kandidati për deputet i PD-së në Korçë më 20 mars denoncoi punësimet elektorale në Bashkinë e Korçës. “Janë disa institucione publike, si Bashkia e Korçës, Ujësjellësi apo INSTAT, të cilët gjatë dy muajve të fundit kanë punësuar dhjetëra presona me kontrata të përkohshme”, tha Andrea Mano. Ndërkohë, 4 ditë pas tij, edhe nënkryetari i LSIsë, Petrit Vasili, përmes një deklarate për mediat, denoncoi të njëjtën gjë. Sipas Vasilit, numri i të punësuarve në administratën shtetërore muajt e fundit është shtuar me mbi 10 mijë. “Është vërtet një situatë skandaloze ajo që po ndodh me financat publike, të cilat janë vënë në dispozicion të punësimeve fiktive, punësimeve elektorale vetëm e vetëm për të orientuar e për të rrëmbyer vota, duke paguar me rroga shteti. Faktet janë shumë të rënda dhe kokëforta. Vetëm në tremujorin e fundit të vitit, administrata publike ka arritur në 182 mijë njerëz dhe janë punësuar dhe shtuar vetëm në tremujorin e fundit 10 mijë njerëz, përfshirë këtu administratë bashkish dhe administratë të qeverisë”, tha Vasili më 24 mars.
REAGIMI Nisur nga shqetësimet e kandidatëve të opozitës, por edhe të mediave, në një seancë publike pak ditë më parë, anëtarja e Komisionit Rregullator, Helga Vukaj, i kërkoi Komisionerit Shtetëror të Zgjedhjeve, Ilirjan Celibashi, që t’i drejtohej me një kërkesë për informacion Drejtorisë se Përgjithshme të Thesarit, Drejtorisë se Përgjithshme të Sigurimeve Shoqërore e Shëndetësore, për numrin e personave te punësuar muaj pas muaji nga data 25 dhjetor (datë kur ka hyrë në fuqi akti i Komisionit Rregullator për veprimtaritë e ndaluara) e deri më sot. Ndërkohë, edhe gatishmëria e Komisionerit Celibashi ka qenë e menjëhershme dhe ka nisur kërkesë për institucionet. Gazeta “Panorama” ka siguruar kërkesën që i është nistur Drejtorisë së Thesarit që bën lëvrimin e fondit të borderosë për ccdo institucion publik. Nëse vërtetohen denoncimet e mediave dhe opozitës, atëherë KQZ-ja ndërhyn për të marrë masa. Kujtojmë që punësimet e reja elektorale janë një nga veprimtaritë e ndaluara 4 muaj para zgjedhjeve.