UDHEZIMI I RI Tokat me “7501”, hiqen kufizimet për sipërfaqen
Zbardhen rregullat e regjistrimit të tokave me 7501. Rastet kur hiqen kufizimet e sipërfaqet që do regjistrohen në Kadastër dhe si ndryshon procesi deri në marrjen e tapisë
Hiqen kufizimet për tokat me 7501. Me ndryshimet e bëra në ligj, qytetarët mund të përfitojnë tokë më tepër deri në 20 për qind të sipërfaqes, ndërsa me ligjin e mëparshëm nuk mund të përfitoje në asnjë rast më shumë se sipërfaqja e përcaktuar në AMTP.
Por kjo vlen për ato familje për të cilat nuk është përmbyllur procesi i regjistrimit nga Kadastra.
PROCESI Kështu, nëse gjatë saktësimit dhe pozicionimit në hartën kadastrale rezulton të ketë familje që kanë në përdorim sipërfaqe shtetërore shtesë, mbi atë të përcaktuar në AMTP, ata kanë të drejtë të kërkojnë kalimin e pronësisë për këto sipërfaqe, deri në 20 për qind të sasisë së sipërfaqes të AMTP-së. “Çmimi i kalimit të pronësisë për sipërfaqen shtesë është ai i përcaktuar në hartën e vlerës së pronës për tokën bujqësore. Mbi sipërfaqen e pronës që blihet, regjistrohet barra ligjore, deri në shlyerjen e vlerës. Kur subjekti nuk e kërkon apo e refuzon, sipërfaqja shtetërore shtesë i kalon fondit të tokës, sipas legjislacionit për trajtimin e pronës dhe përfundimin e procesit të kompensimit të pronave”, përcaktohet në ligj. Por kjo nuk vlen për sipërfaqet e përfituara abuzivisht, të cilat do të kthehen. Ligji parashikon po ashtu që në rastet kur është shitur atëherë ajo familje do të duhet ta paguajë me çmimin e tregut.
VERIFIKIMI Të gjitha AMTP-të e lëshuara deri më tani përpara regjistrimit do të kalojnë në skaner për të parë nëse janë të rregullta apo jo. Por përveç të dhënave, që në disa raste janë jo të plota, ka edhe raste kur akti i marrjes së tokës në pronësi mungon ose në hipotekë është arkivuar vetëm fotokopja dhe jo origjinali i dokumentit. Në këto raste, Kadastra do të duhet që nëpërmjet një shkrese të vërë në dijeni familjen përfituese, bashkinë dhe drejtorinë e administrimit dhe mbrojtjes së tokës (DAMT). Bashkë me kërkesën, i dërgohen edhe një kopje e dokumenteve që ka dosja. Familjet përfituese kanë afat 1 muaj për të dorëzuar aktin origjinal. Nëse nuk disponohet, atëherë procedurat nisin nga e para. Është bashkia që bën verifikimin faktik të tokës bujqësore dhe plotëson aktin e marrjes së tokës në pronësi. Agjencia e Kadastrës ka përcaktuar më herët edhe rregullat e reja që do të aplikohen për titujt e paregjistruar, të cilët nuk e kanë të shënuar sipërfaqen jo vetëm në zonat ku regjistrimi fillestar nuk ka nisur, por edhe aty ku ky proces ka përfunduar. Kështu, kur toka ndodhet në zonat ku nuk është kryer regjistrimi fillestar, duhet që qytetarët të dorëzojnë informacion jo vetëm për pronën që do të regjistrohet, por edhe për pronat kufitare, dokumente hartografike ndihmëse, aktin e verifikimit në terren dhe deklaratat noteriale të pronarëve kufitarë, që vërtetojnë përmbajtjen e kërkesës për kufijtë e pasurisë që pretendohet të regjistrohet. Ndërsa në zonat ku regjistrimi fillestar ka përfunduar, kërkesa duhet të shoqërohet me titullin e pronësisë, planvendosjen, planrilevimin dhe deklaratat noteriale të pronarëve kufitarë, që vërtetojnë përmbajtjen e kërkesës për kufijtë e pasurisë që pretendohet të regjistrohet.