Shqipëria kampion për kanabisin, reagon Meta: Përgjegjësi e Rilindjes
Kreu i Europol, De Bolle: Ndikimi i krimit dhe drogës në jetën e qytetarëve, ekonomi dhe shtetin e së drejtës shumë i madh
Krimi i rëndë dhe i organizuar nuk ka paraqitur kurrë një kërcënim të lartë për BE-në dhe qytetarët e saj si sot. Me gati 40 për qind të rrjeteve kriminale aktive në trafikimin e drogës, prodhimi dhe trafikimi i drogës mbetet biznesi më i madh kriminal në BE
“Europol”-i ka botuar dje Vlerësimin e Kërcënimit të Krimeve të Rënda dhe të Organizuar të Bashkimit Europian, “BE SOCTA 2021”.
Pasi siguroi të dhëna të Europës bazuar në analizën e mijëra rasteve dhe informacioneve të dhëna në 4 vite, “SOCTA” zbuloi një zgjerim shqetësues dhe evolucion të krimit të rëndë dhe të organizuar në BE. Raporti i vitit 2021 nxjerr në pah se edhe në vitin 2021, Shqipëria mbetet një burim kryesor i trafikimit të kanabisit në Bashkimin Europian dhe kërcënim për ekonominë dhe shoqërinë e Europës. Nga të dhënat rezulton se Europa për shkak të trafikut të kokainës dhe COVID-19 ka shkuar në një pikë kritike. Sipas “Europol”-it, ngarkesa të paprecedente janë trafikuar nga Amerika Latine drejt vendeve të BE-së, ndërkohë që grupet kriminale në të dyja kontinentet gjenerojnë miliarda euro. Po ashtu, kjo ka ndikuar drejtpërdrejt te vendet e BE, ekonomitë e të cilave sipas “Europol”-it janë të kërcënuara pasi grupet kriminale po ndikojnë negativisht te sipërmarrjet e goditura nga masat kufizuese, teksa korrupsioni në BE është rritur. Gjithashtu, bie në sy se edhe pastërtia e kokainës që vjen në BE ka arritur majën më të lartë. Në fushën e narkotikëve edhe Shqipëria zë një vend të veçantë, pasi në disa raste, vendi ynë përdoret si transit drejt BE-së, që shihet gjithmonë si destinacioni final i saj. “Krimi i rëndë dhe i organizuar nuk ka paraqitur kurrë një kërcënim të lartë për BE-në dhe qytetarët e saj si sot. Me gati 40 për qind të rrjeteve kriminale aktive në trafikimin e drogës, prodhimi dhe trafikimi i drogës mbetet biznesi më i madh kriminal në BE. Trafikimi dhe shfrytëzimi i qenieve njerëzore, kontrabanda e migrantëve, mashtrimet në internet ‘offline’ dhe krimi i pronës paraqesin kërcënime të konsiderueshme për qytetarët e BE-së”, thuhet në raport. Gjithashtu, “SOCTA”
thotë se: “Kriminelët përdorin korrupsionin pasi bëjnë dhe pastrojnë miliarda euro në vit. Pastruesit profesionistë të parave kanë krijuar një sistem financiar paralel nëntokësor dhe përdorin çdo mjet për të infiltruar dhe minuar ekonomitë dhe shoqëritë e Europës. Pothuajse 60 për qind e rrjeteve kriminale raportuan të përfshira në korrupsion. Më shumë se 80 për qind e rrjeteve kriminale aktive në BE përdorin struktura ligjore të biznesit për aktivitetet e tyre kriminale”. Drejtoresha Ekzekutive e “Europol”-it, Catherine De Bolle, u shpreh se: “Ne jemi në pikën e thyerjes. Ndikimi në jetën e qytetarëve, në ekonomi, në shtetin e së drejtës është shumë i madh. Na duhen veprime të përbashkëta, politika të reja, të rimendojmë se si punojmë. Nuk mjaftojnë vetëm konfiskimet. Këta njerëz po shfrytëzojnë gjithçka nga shoqëria për fitim, pa respekt për jetën. Kjo është ajo që shohim nga ky raport”. Ylva Johansson, Komisioner Europian për Punët e Brendshme thotë se “70 për qind e grupeve kriminale janë aktive në më shumë se tre shtete anëtare. Kompleksiteti i modeleve moderne të biznesit kriminal u ekspozua në vitin 2020, kur autoritetet franceze dhe holandeze të mbështetura nga ‘Europol’ dhe ‘Eurojust’ shpërbënë ‘EncroChat’, një rrjet telefonik i koduar i përdorur nga rrjetet kriminale. Grupet e krimit të organizuar janë profesionistë dhe shumë të adaptueshëm, siç tregohet gjatë pandemisë COVID-19. Ne duhet të mbështesim zbatimin e ligjit për të vazhduar, jashtë linje dhe në internet, për të ndjekur gjurmët dixhitale të kriminelëve”.