Rama: Nuk i përdorim telefonat për t’ju thënë hajde voto për ne
Kryeministri Edi Rama iu përgjigj akuzave të bëra nga Presidenti dhe opozita në lidhje me përdorimin e të dhënave të e-albania për fushatën e tij elektorale. Një ditë pas publikimit në media të skandalit ku dyshohet se PS ka keqpërdorur të dhënat e qytetarëve për zgjedhjet e 25 prillit, Rama tha se e ndërtoi e-albania-n që njerëzit të kapërcenin hallkat e burokracisë. “Me shumë krenari mund t’ju them se jam Kryeministri që e kam shëtitur Shqipërinë, jo për turizëm, por për punë, më shumë se të gjithë kryeministrat e marrë së bashku që kur është krijuar shteti shqiptar. Sikundër jam Kryeministri që u jam përgjigjur të gjithëve edhe në telefon. Sikundër jam Kryeministri që kam ndërtuar një sistem të tërë, atë platformën e bashkëqeverisjes, apo e-albania-n që njerëzit t’i kapërcejnë hallkat e burokracisë, t’i shmangin ata që u dalin përpara në emër të shtetit dhe i pengojnë dhe ta marrin shërbimin dhe ta gjejnë të drejtën. Sa janë ata që falë kontaktit direkt me shtetin kanë marrë shërbimin? Unë dua që e gjithë marrëdhënia e qytetarit me shtetit të bëhet përmes telefonit. Ne nuk i përdorim telefonat për t’jua nxirë jetën juve, me kë je, hajde voto për ne. Por duam që çdo telefon të funksionojë që ne, shteti, t’u zgjidhim juve problemet”, tha kreu i qeverisë.
“Mua nga emigracioni nuk më ka sjellë ndonjë nevojë që të gjej një punë si ministër. Mua nuk më ka futur në politikë halli se nuk dija të bëja punë të tjera. Politika nuk ishte pasioni im i parë. Mua më ka futur në politikë, bindja se maja ku duhet të ngjitet Shqipëria është e arritshme. Atë majë ne mundemi dhe do ta arrijmë”, u shpreh më herët Rama.