Balla: Edi Rama është pengesa e fundit e Saliut dhe Ilirit

Kryeministri Edi Rama dhe drejtuesi politik i Partisë Socialiste për Elbasanin, Taulant Balla, zhvilloi një takim me të rinjtë e Gramshit. Teksa u ndal te procesi i vaksinimit kundër COVID-19, Balla tha se ajo që e diferencon PS-në nga partitë e tjera është se për ta, fushata më e rëndësishme është ajo e fitores së luftës kundër këtij virusi. “Elbasani është qarku me nivelin më të lartë të vaksinimit deri më tani. Ne do ta fitojmë këtë betejë sikurse kryeministri Rama deklaroi që në ditën e parë të kësaj lufte. Ne po bëhemi gati që në fund të majit dhe fillim të qershorit të hapim tërësisht ekonominë”, tha Balla. Sipas numrit dy të PS-së, Gramshi ishte një “xhep” i harruar deri në vitin 2013, ndërsa sot falë Edi Ramës dhe PS-së, ky qytet po shndërrohet në një nyje kryesore të lidhjes mes Perëndimit dhe Lindjes së Shqipërisë. Kreu i Grupit Parlamentar të PS-së tha më tej se do t’u jepet një grant prej 5000 eurosh të gjithë emigrantëve që kthehen në Gramsh dhe kthejnë shpinë e tyre në një bujtinë. Ndërsa u kujtoi të rinjve të Gramshit diferencën e bërë në zonë nga qeveria Rama dhe PS-ja, Balla shtoi se ata nuk duhet të lejojnë rikthimin e Saliut dhe Ilirit. “Luli është kot. Është një dordolec që ata e hedhin mes njëri-tjetrit. Iliri dhe Saliu janë aty për t’u rikthyer përsëri tek diplomat që shiteshin tek rruga e Kavajës. Edi Rama është pengesa e fundit e Saliut dhe Ilir për të zhbërë gjithçka që është arritur deri më tani. Prandaj është shumë e rëndësishme që ne të kuptojmë që ky nuk është një mandat për Edi Ramën, për Partinë Socialiste, por është një mandat për Elbasanin, është mandati i vijimit të transformimit të qarkut tonë me njerëz kaq të mirë, punëtorë dhe mikpritës.”, theksoi Balla.