Laboratori i drogës në Kurbin, Gjykata lë në burg 24-vjeçarin

LAÇ - Gjykata e Kurbinit ka lënë në burg Vranicki Hiskun, i cili u arrestua tri ditë më parë nga Policia, pas zbulimit të një laboratorit të kultivimit të bimëve narkotike brenda një magazine në Gjormë të Kurbinit. Referuar provave të paraqitura nga Prokuroria, gjyqtari Olti Skrame e cilësoi të ligjshëm arrestimin e 24-vjeçarit, duke vendosur ndaj tij masën e sigurisë “Arrest me burg” me afat 45 ditë, deri në administrimin e rezultateve të ekspertimeve të vendosura për t’u kryer, të akteve lidhur me posedimin dhe përdorimin e vendit të ngjarjes, si dhe të akteve të pretenduara nga personi në hetim. Ndërkohë, avokati i të ndaluarit ka deklaruar se klienti i tij nuk ka lidhje me laboratorin e drogës, duke kërkuar një masë më të butë, por kërkesa u refuzua nga togat e zeza. Vranicki Hisku u arrestua të premten nga Policia e Kurbinit në kuadër të operacionit “Gjormë 2021”, ndërsa është shpallur në kërkim drejtori i Hipotekës së Kurbinit Edmond Stojani. Sipas Policisë, këta shtetas në bashkëpunim me njëri-tjetrin, në fshatin Fushë-Gjormë, Kurbin, kishin përshtatur katin e dytë të një magazine të marrë me qira, me aparatura që shërbejnë për kultivimin e bimëve narkotike. Gjatë kontrollit të ambientit u gjetën dhe u sekuestruan 205 bimë të dyshuara narkotike kanabis sativa të kultivuara në vazo. Gjithashtu, gjatë kontrollit, në ndërtesë u konstatua një lidhje e paligjshme e energjisë elektrike, e cila shërbente për furnizimin me energji të pajisjeve si llamba, aspirator, filtra ajrimi etj., që ndihmonin në kultivimin dhe rritjen e bimëve narkotike. Po gjatë operacionit, në banesën e shtetasit Vranicki Hisku është gjetur dhe sekuestruar dhe një armë zjarri pushkë me dylbi të montuar. Ndaj 24-vjeçarit janë ngritur akuzat “Kultivimi i bimëve narkotike”, “Armëmbajtja pa leje” dhe “Vjedhja e energjisë elektrike”. e.h