Lajçak: Nëse ka vullnet politik në Kosovë e Serbi, marrëveshjen e arrijmë brenda disa muajsh
Guterres: Paqja dhe zhvillimi varen nga dialogu Kosovë-Serbi
Ndërkombëtarët e përfshirë në të gjitha institucionet e larta, në kërkimin e një zgjidhjeje dhe pajtimi mes Kosovës dhe Serbisë, po përpiqen në të gjitha mënyrat që të rinisin dialogun mes dy qeverive të vendeve fqinje dhe ta çojnë atë drejt një finalizimi.
I dërguari i Bashkimit Europian për dialogun KosovëSerbi, Miroslav Lajçak, tha se marrëveshja është “teknikisht e realizueshme brenda disa muajsh, nëse të dy palët e duan atë dhe kanë vullnetin politik”. Ai theksoi që anëtarët e BE-së presin që dialogu të vazhdojë pa vonesë dhe “të arrijë një përparim të shpejtë në negociatat e marrëveshjes gjithëpërfshirëse”. Në një intervistë për agjencinë serbe të lajmeve, “Beta”, Lajçak theksoi se udhëheqësit në Prishtinë dhe Beograd duhet të “investojnë përpjekje dhe kapital politik, të kenë vullnet dhe guxim politik, si dhe një mandat nga populli, që do të thotë besim, mbështetje dhe mirëkuptim për popujt e tyre për çështje për të cilat negociojnë vendimet e vështira që pritet të vijnë”. Sipas Lajçak, shtetet anëtare të BE-së presin vazhdim të menjëhershëm dhe përparim të shpejtë të dialogut drejt marrëveshjes, “me respektimin dhe zbatimin e të gjitha marrëveshjeve të arritura deri më tani”.
Problem për këtë kërkesë, është që qeveria e Kosovës nuk mund të zbatojë marrëveshjen e shumëkërkuar nga Serbia, mbi formimin e Asociacionit të komunave me shumicë serbe në Kosovë, pasi kjo bie ndesh me Kushtetutën dhe me parimin e bashkëjetesës shumetnike. Por, detajet me sa duket nuk iu interesojnë shumë ndërkombëtarëve. Për ta rëndësi ka kryerja e kësaj punë, gjetja e një marrëveshjeje finale me zbatimin e asaj çka është nënshkruar deri më tani nga qeveritë pararendëse të dy vendeve. Lajçak ka theksuar se marrëveshja “duhet të gjejë zgjidhje të qëndrueshme për çështjet e hapura dhe të kontribuojë në stabilitetin e të gjithë Ballkanit Perëndimor”.
I pyetur se çfarë pret nga vazhdimi i dialogut, nëse Presidenti serb Aleksandar Vuçiç thekson se kushti pa të cilin nuk ka negociata është që të zbatohet dispozita e Marrëveshjes së Brukselit për krijimin e Asociacionit të komunave me shumicë serbe me kompetenca ekzekutive, ndërsa kryeministri i Kosovës Albin Kurti refuzon, Lajçak tha se BE-ja është ndërmjetës dhe se përparimi varet nga dy anët. “Çështjet në diskutim, shpejtësia dhe përparimi varen nga vullneti i të dyja palëve garanton që gjithçka për të cilën do të bihet dakord do të jetë në përputhje me ligjin ndërkombëtar, vlerat dhe normat e BE-së…”, tha ai.
Ndërkohë, sekretari i Përgjithshëm i Organizatës së Kombeve të Bashkuara, Antonio Guterres, vlerësoi se paqja e qëndrueshme, stabiliteti dhe zhvillimi socialo-ekonomik në Kosovë dhe rajon varen nga përparimi i qëndrueshëm në dialogun që synon normalizimin e marrëdhënieve mes Kosovës dhe Serbisë. Në raportin e ri gjashtëmujor mbi punën e misionit të OKB-së në Kosovë (UNMIK), Guterres theksoi se përparimi në dialog mbetet gjithashtu thelbësor për aspiratat evropiane të të dy vendeve. “Ndërsa i mirëpres deklaratat e qarta të të dy palëve mbi rëndësinë e avancimit të dialogut, unë nënvizoj rëndësinë e një angazhimi të vërtetë për të vazhduar bisedime të nivelit të lartë brenda dialogut të mbështetur nga BE-ja në një të ardhme shumë të afërt”, tha Guterres në raport.