Dosja e “përgjimeve” të PS zbulon edhe votën e kreut të SHISH, si funksionon skema e patronazhit për çdo pallat
Baza e të dhënave në PS tregon preferencat politike të personazheve të njohur të skenës dhe ekranit, këngëtarëve, prezantuesve dhe aktorëve
Patronazhit të Partisë Socialiste nuk i ka shpëtuar as kreu i Shërbimit Informativ Shtetëror, Helidon Bendo.
Siç raporton portali “Lapsi.al”, patronazhistja me emrin Marjana Ndraka ka raportuar se Bendo ka preferenca për PS-në dhe se ai mund të konsiderohet votues i sigurt për PS. Në raportimin për shefin e SHISH, janë të gjitha të dhënat si: numër telefoni, numri i kartës së identitetit, qendra e votimit etj., por nuk është shënuar vendi i punës. Në sitën e bazës së të dhënave elektorale të PS-së, përveç kreut të SPAK, Arben Kraja, ku është kërkuar të hetohet kjo çështje, “Lapsi.al” ka arritur të qëmtojmë tetë nga prokurorët e SPAK, 4 nga të cilët figurojnë si votues të sigurt të PS-së, 2 jo të sigurt, por me preferencë PS, dhe dy neutralë të cilëve nuk u dihet vota. Partia Socialiste ka krijuar një bazë të dhënash personale për 910 mijë votuesit e qarkut të Tiranës, ku zbulohen preferencat politike të secilit. Portali “Lapsi.al” ka arritur të sigurojë këtë bazë të dhënash, duke e bërë publike, ndërsa nuk kanë munguar edhe reagimet politike. Dokumenti përmban të dhënat personale, si numrat e telefonit, numrin e kartës së identitetit, numrin e qendrës së votimit, vendin e punës për shumicën e të regjistruarve dhe një përshkrim të përkatësisë politike për secilin prej qytetarëve të Tiranës. Fakti që kjo bazë të dhënash ka numrin e kartës së identitetit, tregon se të dhënat mund të jenë marrë nga një prej institucioneve zyrtare, ndërsa ka dhe të dhëna se si i janë përgjigjur censusit të PS-së në 2013-ën qytetarët e pyetur. Në dokumentin e siguruar nga “Lapsi.al”, që është afërsisht 234 MB, përkatësia politike e secilit është përshkruar shkurt me PO ose me JO në një kolonë nga personat që janë pjesë e skemës së “patronazhit”. “Patronazhistët” quhen ndryshe anëtarët e PSsë, që përmes kontakteve, telefonatave apo të njohurve të përbashkët, krijojnë një ide të përafërt të bindjeve politike të secilit prej nesh.
SI FUNKSIONON SKEMA
Fushata zgjedhore në Partinë Socialiste është e bazuar mbi një mbulim kapilar të çdo qelize të komuniteteve, nga të cilat burojnë dhe votuesit. Në çdo pallat apo grup pallatesh, lagje fshati apo komunitete të vogla është vendosur një patronazhist, person i njohur në zonë, që njeh mirë banorët dhe arrin të marrë informacione për ta. Ai liston të gjithë emrat e votuesve dhe përcakton se cila është preferenca e tij politike, si ka votuar në zgjedhjet e shkuara. Sa më të sakta të jenë këto të dhëna, aq më i përafërt edhe parashikimi i rezultatit që PS pritet të marrë. Më pas, shtabet e zonave nisin të punojnë me votuesit që deklarohen si të pavendosur apo edhe ata që kanë votuar më parë kundërshtarin politik, për ta kontaktuar mbi bazë njohjesh, krahinash, prejardhjeje apo dhe krushqish që ata kanë. Kjo kërkon detajime në informacionin për ta, duke marrë më shumë të dhëna për punën që bën dhe institucionin apo biznesin ku punon, të afërmit e tij etj. Mbi bazën e këtyre kontakteve krijohet një objektiv i mundshëm i votave që PS-ja kërkon të marrë në zgjedhje.
ARTISTËT Në listën sekrete që “Lapsi.al” ka arritur të sigurojë, janë vjedhur dhe të dhënat personale të njerëzve të skenës dhe të ekranit, nr. i tyre i telefonit, i ID e kështu me radhë. Sipas kritereve të rilindjes, ata ndahen në votues të sigurt të PS ose si jo të tillë. Kështu, Ardit Gjebrea konsiderohet votues i sikurt, por megjithatë për t’u siguruar, partia i ka vënë atij nga pas si “patronazhist” Natasha Toskën. Po e njëjta gjë dhe me Alketa Vejsiun, e cila mbikëqyret si patronazhiste nga Erald Qosja. Ndërsa Rovena Dilo, që figuron votë e sigurt socialiste, monitorohet nga Anila Grabocka.