Meta: Becchetti është vetëm fillimi i grabitjes kriminale të shqiptarëve

Presidenti i Shqipërisë, Ilir Meta, ka paralajmëruar se detyrimi i shtetit shqiptar ndaj biznesmenit Francesco Becchetti është vetëm fillimi i zbrazjes së buxhetit nga shpërdorim kriminal i parave të shqiptarëve. Përmes një mesazhi në “Facebook”, kreu i shtetit thotë se janë edhe 235 milionë euro me probabilitet të lartë për t’u paguar si dëmshpërblim nga shpërdorimi.”Zbrazja e buxhetit për të paguar Becchetti-n është shpërdorim kriminal i parave të shqiptarëve. Është një grabitje e të ardhurave buxhetore më të ulëta në rajon në raport më PPB, 27 përqind, të cilat janë 10 pikë më poshtë se mesatarja europiane. Dhe nuk është vetëm Becchetti. Ai është vetëm fillimi, sepse në radhë janë edhe plot 235 milionë euro me probabilitet të lartë për t’u paguar si dëmshpërblim nga papërgjegjshmëria dhe shpërdorimi. Prandaj, 25 prilli është referendum popullor për të çuar para drejtësisë shpërdoruesit e parave të shqiptarëve”, shkruan Meta. Ndërkohë, revista ekonomike “Monitor”, në një editorial me titull: “Buxheti dhe Becchetti”, rendit disa çështje gjyqësore ende të pambyllura, por me propabilitet të lartë për t’u humbur dhe pritet t’i kushtojnë buxhetit të shtetit një shumë deri në 450 milionë dollarë. “Goditja finale buxhetit të shtetit i erdhi nga Qendra Ndërkombëtare për Zgjidhjen e Mosmarrëveshjeve të Investimeve (ICSID), një gjykatë arbitrazhi, pjesë e Bankës Botërore qëdha vendimin përfundimtar në gjyqin me FrancescoBecchetti, duke e detyruar qeverinë shqiptare të paguajë 110 milionë euro për dëmin që i ka shkaktuar sipërmarrësit italian për mbylljen e televizionit ‘Agon’ në vitin 2015. Bashkimi i kompanive ‘Copri’ dhe ‘Aktor’, të cilat ishin të angazhuara në ndërtimin e autostradës Tiranë-Elbasan, ka arritur të fitojë në fazën e parë një dëmshpërblim prej 45 milionë dollarësh. Kompania italojaponeze, ‘DondiKubota’, e cila zbatoi projektin impiant të përpunimit dhe pastrimit të ujërave të zeza të Tiranës, pretendon 90 milionë euro dëme për ndërprerje kontrate. ‘Arka Energy B.V.’, që fitoi dhe më pas iu anulua tenderi për parkun fotovoltaik të Akërnisë në Fier, kërkon në arbitrazh 110 milionë euro. Përplasja e qeverisë me ‘Durrës KurumShipping’, për ndërprerje kontrate, mund të kushtojë 100 milionë euro. Në total, dëmshpërblimi potencial llogaritet rreth 450 milionë euro, një shumë që është më shumë se gjysma e shpenzimeve kapitale të një viti dhe mund ta çonte buxhetin në paaftësi paguese, nëse të gjithë do të kërkonin njëherësh të paguheshin”, thotë “Monitor” në editorialin e tij.