“Aleanca” akuzë Soreca për Teatrin, BE: Mashtrim
Kalaja: Nëse pretendimet janë të vërteta, do marrim hapat ligjorë që Soreca të shpallet “non grata”, do njoftojmë BE-në
Aleanca për Mbrojtjen e Teatrit ka denoncuar publikisht duke akuzuar ambasadorin e Bashkimit Europian, Luigi Soreca, se po ndikon në vendimin e Gjykatës Kushtetuese për çështjen e Teatrit.
Përmes një deklarate për mediat, përfaqësuesja e Aleancës, Adriana Kalaja, ka deklaruar se akuza bazohet në një vizitë që ambasadori Soreca ka bërë me kryetarët e kësaj Gjykate pak para nisjes së seancës më datën 16 qershor. Aleanca pretendon se takimi i Sorecës me kreun e Kushtetueses është mbajtur qëllimisht i fshehur dhe se ky veprim tregon qartë se ambasadori i BE-së po bën presion ndaj kësaj Gjykate dhe po lobon në mbrojtje të kryetarit të Bashkisë së Tiranës. Aleanca sqaroi se nëse pretendimet e tyre janë të vërteta, ata do kërkojnë që ambasadori i BE-së, të shpallet “non grata” në Shqipëri. Kalaja tha se Aleanca kërkon nga SPAK-u sekuestrimin e kamerave të sigurisë, ndërsa është paralajmëruar edhe një kallëzim penal. Por, ky pretendim ndaj ambasadorit Luigji Soreca është hedhur poshtë nga zyra e Bashkimit Europian në Tiranë. Përmes një deklarate për mediat, zyra e BE-së përgënjeshtron deklaratat dhe pretendimet e përfaqësueses Aleancës për Mbrojtjen e Teatrit, duke i konsideruar si shpifje. Në deklaratë delegacioni i BEsë në Shqipëri sqaron të vërtetën e takimit të ambasadorit Luigji Soreca me kryetaren e Gjykatës Kushtetuese, Vitore Tusha. BE-ja sqaron se takimi në datën 16 qershor ishte në kuadër të të gjitha takimeve që ambasadori ka zhvilluar me të gjithë drejtuesit e institucioneve të drejtësisë, ndërsa vë theksin se BE-ja do të vazhdojë të mbështesë fuqimisht dhe në mënyrë sistematike pavarësinë e të gjitha institucioneve gjyqësore shqiptare. Kujtojmë që në datën 16 qershor në Gjykatën Kushtetuese u zhvillua seanca për çështjen e shembjes së Teatrit Kombëtar, ku paditës është Presidenti Ilir Meta. Pavarësisht se kanë kaluar dy javë nga mbajtja e kësaj seance, ende Kushtetuesja nuk ka marrë asnjë vendim për këtë çështje. Nga ana tjetër, Bashkia e Tiranës ka prezantuar edhe projektin e ri të Teatrit Kombëtar, ndërsa KKT-ja e Qeverisë Shqiptare miratoi edhe lejen për Teatrin e Ri Kombëtar të Bashkia Tiranë nga “Bjarke Ingels”.
DEKLARATA E ALEANCËS PËR TEATRIN
“Anëtarë të Aleancës për Teatrin, të cilët punojnë te bizneset e godinës së Gjykatës Kushtetuese, kanë konstatuar se ditën e mbajtjes së seancës së Teatrit, ambasadori Luigi Soreca ka bërë një takim jopublik me kreun e Gjykatës, në 16 qershor, dhe më pas ka dalë nga dera e pasme e Gjykatës. Ne jemi shumë të shqetësuar sepse nuk e kuptojmë arsyen se përse ambasadori ka ardhur në këtë ditë seance. Ne, në kërkesat tona drejtuar Gjykatës Kushtetuese, kemi kërkuar të bëhet publike nëse ky takim ka pasur interes publik, kemi kërkuar që të bëhet publike se çfarë është diskutuar dhe e fundit pse takimi ishte ndryshe nga takimet e tjera që bëhen publike. Për ne fakti që ambasadori është larguar nga dera e pasme e godinës, cenon shumë njëanshmërinë e Gjykatës Kushtetutës, cenon legjitimitetin e kryetares së Gjykatës apo kujtdo tjetër që ka bërë këtë takim të bërë publik për mediat. Takimi është zhvilluar brenda Gjykatës dhe informacioni që ne kemi është se Soreca ka ardhur për të lobuar në mbrojtje të kryetarit të Bashkisë, sepse mendon se ne qëndrestarët e Teatrit mund t’i kalojmë gjërat kaq lehtë. Ne me këtë kërkesë së sotme i kemi kërkuar SPAK të sekuestrojë kamerat brenda dhe jashtë Gjykatës Kushtetuese. Nëse do jetë e vërtetë ajo që ne pretendojmë do kërkojmë vetë largimin e kryetares nga trupi gjykues, në të kundërt ne do kërkojmë përjashtimin e gjyqtares nga trupi gjykues. Po bëjmë gati gjithë informacionin do ja bëjmë të ditur BE, sesi një ambasador vjen dhe bën presion pranë Gjykatës Kushtetuese. Ne po bëjmë gati dokumentacionin, do kallëzohet edhe penalisht, por do t’i bëhet e ditur edhe BE-së. Ne do marrim gjithë hapat ligjorë që Soreca të shpallet non grata”. DEKLARATA E DELEGACIONIT
TË BE-SË “Delegacioni i Bashkimit Europian në Shqipëri përgënjeshtron me forcë deklaratat bazuar në shpifje prej një përfaqësueseje të Aleancës për Mbrojtjen e Teatrit Kombëtar drejtuar ambasadorit Luigi Soreca. Delegacioni i BE-së në Shqipëri konfirmon që ambasadori Soreca është takuar me kryetaren e Gjykatës Kushtetuese, znj. Vitore Tusha, mëngjesin e 16 qershorit 2021. Takimi ishte pjesë e një serie takimesh që ambasadori po zhvillon gjatë ditëve të fundit me të gjithë kryetarët e institucioneve të drejtësisë për të diskutuar mbi gjendjen e zbatimit të Reformës në Drejtësi në Shqipëri. Gjatë takimit nuk pati asnjë diskutim në lidhje me çështjen e hapur në Gjykatë mbi Teatrin Kombëtar. Delegacioni i BE-së në Shqipëri dhe ambasadori Soreca vazhdojnë të mbështesin fuqimisht dhe në mënyrë sistemike pavarësinë e të gjitha institucioneve gjyqësore shqiptare. Delegacioni i BE-së rezervon çdo të drejtë për të ndjekur ligjërisht deklaratat e bazuara në shpifje të bëra sot në media”.
Delegacioni i BE-së në Shqipëri konfirmon që ambasadori Soreca është takuar me kryetaren e Gjykatës Kushtetuese, znj. Vitore Tusha, mëngjesin e 16 qershorit 2021. Takimi ishte pjesë e një serie takimesh që ambasadori po zhvillon gjatë ditëve të fundit me të gjithë kryetarët e institucioneve të drejtësisë për të diskutuar mbi gjendjen e zbatimit të Reformës në Drejtësi në Shqipëri.
Ditën e mbajtjes së seancës së Teatrit, Soreca ka bërë një takim jo publik me kreun e gjykatës në 16 qershor dhe më pas ka dalë nga dera e pasme e Gjykatës. Informacioni që ne kemi është se Soreca ka ardhur për të lobuar në mbrojtje të kryetarit të Bashkisë. Ne po bëjmë gati dokumentacionin do kallëzohet edhe penalisht, por do ti bëhet e ditur edhe BE. Do marrim gjithë hapat ligjorë që Soreca të shpallet non grata