Kushtetuesja “fërshëllen” faullin e parë për zgjedhjet: Listat 100% të hapura
Gjykata rrëzon nenin që i jep përparësi listës së kandidatëve që zgjedhin kryetarët e partive, t’i zgjedhin qytetarët
Gjykata Kushtetuese ka vendosur të shfuqizojë si të papajtueshme me Kushtetutën nenin e Kodit Zgjedhor, që parashikon ndarjen e mandateve me thyerjen e herësit.
Kushtetuesja ka pranuar kërkesën e Bindjes Demokratike të Astrit Patozit dhe Lëvizjes Demokratike Shqiptare të Myslim Murrizit, të cilët kanë kërkuar heqjen e pikës 3 të nenit 163 të Kodit Elektoral. Vendimi i Gjykatës Kushtetuese krijon mundësinë që listat e kandidateve të partive politike do të jetë të hapura 100%. Me këtë vendim të Kushtetueses nuk do të ketë më përparësi renditja e kandidatëve në listë sipas pëlqimeve të kryetarëve të partive, por renditja do të bëhet sipas mbështetjes që do të kenë kandidatët në garë. “Gjykata Kushtetuese e Republikës së Shqipërisë mori në shqyrtim në seancën plenare publike të datës 09.06.2021 çështjen me kërkuese Partinë Bindja Demokratike dhe Partinë Lëvizja Demokratike Shqiptare, me objekt shfuqizimin e nenit 163 të ligjit nr. 10019, datë 29.12.2008 “Kodi Zgjedhor i Republikës së Shqipërisë”, të ndryshuar me nenin 21 të ligjit nr. 118/ 2020, si i papajtueshëm me Kushtetutën e Republikës së Shqipërisë. Në përfundim të shqyrtimit, Gjykata Kushtetuese VENDOSI: Pranimin pjesërisht të kërkesës. Shfuqizimin e pikës 3 të nenit 163 të Kodit Zgjedhor si të papajtueshëm me Kushtetutën. Vendimi përfundimtar do të shpallet i arsyetuar brenda afateve ligjore të parashikuara nga ligji nr. 8577, datë 10.02.2000 “Për organizimin dhe funksionimin e Gjykatës Kushtetuese të Republikës së Shqipërisë”, i ndryshuar”, thekson Gjykata Kushtetuese. Por çfarë parashikon pika 3 e nenit 163 të Kodit Zgjedhor të Shqipërisë? Në atë nen përcaktohet se si bëhet shpërndarja e mandateve pas përllogaritjes së numrit të votave me numrin e mandateve. “Në fillim përfitojnë mandat kandidatët që kanë marrë një numër votash parapëlqyese më të madh se herësi që del nga pjesëtimi i numrit të votave të subjektit me numrin e mandateve të fituara nga subjekti, sipas nenit 162 të këtij Kodi. Në çdo rast, herësi nuk mund të jetë më shumë se 10 000 vota. Në rast se herësi që përftohet nga pjesëtimi është një numër me mbetje dhjetore, si herës merret numri i plotë më i afërt”, thuhet në Kodin Zgjedhor.
PËRLLOGARITJA E VOTAVE TË VLEFSHME
Ndërkohë, dje Gjykata Kushtetuese ka rrëzuar ankimimin e aleatëve të vegjël të PD-së, të cilët kërkonin që votat e vlefshme për të shpërndarë fondet për to të mos përllogaritet numri mesatar i votave për një mandat, por çdo votë që është marrë në emër të partisë së tyre.