Vajza e Bashkim Finos emërohet zëvendësministre për Europën
Posti për Megi Finon u propozua nga Kryeministri Rama. Ajo u aktivizua në zgjedhjet e 25 prillit pasi ndërroi jetë i ati
Me propozim të Kryeministrit Edi Rama, vajza e të ndjerit Bashkim Fino, Megi Fino, është emëruar zëvendësministre për Europën dhe Punët e Jashtme.
Vendimi është miratuar dje nga Këshilli i Ministrave, ndonëse në mbledhje nuk ishte propozuesi, pra Kryeministri. Megi Fino u aktivizua në zgjedhjet e 25 prillit publikisht pasi ndërroi jetë i ati. Bashkim Fino, deputet i Partisë Socialiste dhe ish-Kryeministër, ndërroi jetë në moshën 59vjeçare për shkak të pasojave që i la infektimi me Covid-19. Në nder të tij, qeveria shpalli 29 marsin ditë zie, ku flamujt në të gjitha institucionet u ulën në gjysmështizë. Bashkim Fino ishte kandidat për deputet për zgjedhjet e 25 prillit. Ai ishte i katërti në listën e Partisë Socialiste në qarkun e Fierit. Ndërkaq, Këshilli i Ministrave në mbledhjen e drejtuar nga zëvendëskryeministri Erion Braçe miratoi edhe dy ndryshime të tjera në qeveri të imponuara nga zgjedhjet e 25 prillit. Kështu, qeveria vendosi dje që të lirojë nga detyra zëvendësministrin e Infrastrukturës, Etjen Xhafa. Ky i fundit u zgjodh deputet në zgjedhjet e 25 prillit, kandidoi në qarkun e Tiranës dhe më konkretisht në zonën e Kavajës.
Ndërsa vendimi tjetër i imponuar nga zgjedhjet e fundit ishte lirimi nga detyra i zëvendësministrit të Mbrojtjes, Petro Koçi. Ky i fundit u zgjodh deputet i Partisë Socialiste në qarkun e Fierit. Që prej vitit 2014 Petro Koçi mbante postin e zëvendësministrit të Mbrojtjes. Ndërkohë ai do të rikthehet në Parlament pas një shkëputjeje që nga viti 2009. Ky është mandati i 4-t për Petro Koçin që zgjidhet si deputet i Parlamentit shqiptar. Për herë të parë Koçi u bë ligjvënës i Shqipërisë në vitin 1997-2001, më pas rikandidoi në vitin 2001 dhe mbajti mandatin e deputetit deri më 2005ën.
Qeveria vendosi dje që të lirojë nga detyra zëvendësministrin e Infrastrukturës, Etjen Xhafa. Ky i fundit u zgjodh deputet në zgjedhjet e 25 prillit, kandidoi në qarkun e Tiranës dhe më konkretisht në zonën e Kavajës. Ndërsa vendimi tjetër i imponuar nga zgjedhjet e fundit ishte lirimi nga detyra i zëvendësministrit të Mbrojtjes, Petro Koçi
Ndërsa në zgjedhjet e 2005-ës ishte mandati i 3-të që mori kur në krye të PS-së ishte Fatos Nano. Ndërsa me ardhjen e Edi Ramës në krye të PS-së, Koçi nuk u kandidua në listat e PS-së. Ky i fundit më pas hapi partinë e tij, por megjithatë nuk arriti që të futej në Parlament.