Qesharake, Këshilli Bashkiak i Vlorës, mbledhje në bulevard
Leli: Mbledhja duhet të bëhet dhe me dakordësinë time
Ngërçi në Bashkinë e Vlorës vijon të thellohet më shumë. Ditën e djeshme ka dështuar mbledhja e radhës e Këshillit Bashkiak të Vlorës me kryebashkiakun Leli. Anëtarët e Këshillit Bashkiak shkuan për të zhvilluar mbledhjen në teatrin “Petro Marko”, por si edhe më parë, dera ishte mbyllur dhe kryebashkiaku nuk ishte i pranishëm, pa,i siç kishte njoftuar, kërkonte që mbledhja të bëhej online. Por Këshilli Bashkiak i Vlorës ishte i bindur për të zhvilluar mbledhjen me prani fizike dhe në trotuarin ngjitur sollën karrige dhe tavolina për zhvillim e saj, ku morën disa vendime. Ndërkohë, kryebashkiaku Dritan leli, përmes një postimi në “Facebook”, shpjegoi se ai ka kërkuar që mbledhja të zhvillohej në datë 29, por këshilli e vendosi në datë 30 pa asnjë sqarim. Më tej ai thotë se mbledhjet e Bashkisë duhet të përcaktohen me dakordësinë paraprake të kryebashkiakut për të qenë prezent. “Dua të njoftoj ju pjesëmarrësit dhe qytetarët e Vlorës. I kam dërguar dje një letër kryetares së Këshillit Bashkiak ku e kam informuar se në përgjigje të kërkesës suaj me nr. 9824, datë 24 qershor, ju është kërkuar të caktoni datën 29 për mbledhje të Këshillit të Bashkisë, të cilën ju e keni refuzuar duke caktuar pak orë pas kërkesës time datën 30 qershor, pa asnjë sqarim. Me një kërkesë tjetër u është bërë me dije se për një aktivitet të organizuar më parë, kryebashkiaku nuk mund të marrë pjesë në mbledhjen e 30 qershorit. Pavarësisht mungesës, administrata e bashkisë dhe nënkryetari do të jetë prezent në mbledhjen e datës 30 qershor, siç jemi tani, e shtyva këtë aktivitet. Kjo mbledhje nuk mund të zhvillohet veçse online, pasi janë në fuqi masat e përcaktuara nga grupi i ekspertëve. Në rastin konkret, përgjegjësia ligjore për organizimin e Këshillit Bashkiak i takon administratës dhe kryebashkiakut, ndërkohë që sjellim në vëmendjen tuaj se përgjegjësia e organizimit të eventeve ndryshe nga ajo që parashtruar më lart, u takon organizatorëve. Ju rikujtojmë që datat për mbledhjen e Bashkisë duhet të përcaktohen me dakordësinë paraprake të kryebashkiakut për të qenë prezent”, tha Leli.