U arrestua me 17 kg heroinë, lihet në burg shoferi
Zbardhet dëshmia: S’kam pasur dijeni për lëndën narkotike, isha i punësuar
Gjykata e Durrësit ka lënë në burg Sulo Pajon, 55-vjecari nga Vlora që u arrestua pak ditë më parë pasi tentoi të trafikonte heroinë drejt Malit të Zi. Trupi gjykues pranoi kërkesën e prokurorit Sokol Nishani, i cili kërkoi të vlerësohej i ligjshëm arrestimi i 55-vjecarit dhe të vendosej si masë sigurie për të ajo e “Arrestit në burg”. Vetë i akuzuari ka mohuar akuzat duke u vetëdeklaruar i pafajshëm, ndërkohë që avokati mbrojtës i shoferit të kamionit ku u gjetën 17 kilogramë lëndë narkotike e llojit heroinë kërkoi masë më të lehtë sigurie për të me argumentin se nuk do të largohej nga vendi dhe do të jetë në dispozicion të prokurorisë. “Nuk kam pasur dijeni për lëndën narkotike. Unë jam shofer kamioni, jam i punësuar. Skam asnjë lidhje, jam i pafajshëm”, është shprehur shkurtimisht para togave të zeza 55-vjeçari nga Vlora.
HETIMI Policia e Shkodrës dhe konkretisht sektori i Antidrogës kishte informacione për një grup kriminal që trafikonte heroinë nga Shqipëria drejt Malit të Zi. Ndaj edhe po mbante nën vëzhgim 55-vjeçarin nga Vlora. Në momentin që kamioni që ai drejtonte ka mbërritur në pikën kufitare të Hanit të Hotit agjentët i kërkuan të shkonte te pika e kontrollit. “Kishim informacion se një grup kriminal trafikonte heroinë nga Shqipëria drejt Malit të Zi. Në rrugë operative kishim marrë informacion se në kamion ndodhej një sasi e madhe lënde narkotike, ndaj edhe urdhëruam që të kontrollohej kamioni. Zbuluam se në serbatorin rezervë ishin fshehur disa pako me lëndë narkotike që rezultoi heroinë. Nuk ishim të sigurt nëse ishte vetëm kjo sasi apo ishte fshehur edhe në pjesë të tjera të kamionit dhe kërkuam që kamioni të shkonte në Portin e Durrësit, pasi aty ndodhet skaneri modern”, thuhet nga agjentët e Antidrogës së Shkodrës, deklarata që ndodhen në dosjen e prokurorisë. KONTROLLI SPECIALIZUAR Më datë 26 qershor, strukturat hetimore të Drejtorisë Vendore të Policisë Shkodër, në bashkëpunim me strukturat e Policisë Kufitare të DVKM Shkodër, në bazë të informacioneve të marra në rrugë operative, bazuar dhe në analizën e riskut, kanë kaluar për kontroll në vijën e dytë, në pikën e kalimit kufitar Hani i Hotit, një kamion me targa shqiptare që po qarkullonte për në drejtim të Malit të Zi. Për një kontroll më të specializuar kamioni është shoqëruar në Portin e Durrësit, ku është kontrolluar nga task-forca permanente e përbërë nga strukturat hetimore të DVP Durrës, Policia Kufitare e Portit Durrës dhe autoritetet doganore të Portit Durrës. Nga kontrolli i specializuar rezultoi se në kamion kishte të fshehur rreth 17 kilogramë lëndë narkotike të dyshuar heroinë. Nga veprimet e para hetimore është arrestuar ne flagrance drejtuesi i kamionit ku u gjet lënda narkotik. Grupi hetimor vijon punën për zbardhjen e plote të këtij rasti, identifikimin dhe kapjen e personave të tjerë të përfshirë ne këtë tentativë për trafikim të drogave të forta”, thuhet në komunikatën e Policisë. l.m