SI PERFITOHET
Të përndjekurit, skema për rishikim pensioni
Si ndryshon skema e pensioneve për ish-të përndjekurit dhe personat në internim e dëbim. Rastet kur mund të rishikohet masa e pensionit dhe si aplikohet për të përfituar. Sqarimi zyrtar
Personat, të cilët kanë qenë të internuar apo të dëbuar gjatë regjimit komunist, do të trajtohen me pensione të posaçme.
Një gjë e tillë është e përcaktuar edhe në ligj, por mospërgatitja e VKM-së nga ana e Këshillit të Ministrave ka mbajtur pezull procesin. Në 2015-n u ngrit një grup i posaçëm pune, por drafti i hartuar prej tyre nuk e pa dritën e botimit. Gati 6 vite me vonë, diskutimi është rihapur sërish.
NISMA Gjatë një takimi me grupet e interesit, kryetarja e Autoritetit të Dosjeve, Gentiana Sula, tha se do të përgatitet një propozim për pensionet e të internuarve, ku veç të tjerash do të sugjerohet edhe rregullimi i kuadrit ligjor përkatës, që u mundëson të ardhura të internuarve në diktaturë. “Problem i rëndësishëm, me të cilin hasen ishtë përndjekurit sot dhe trashëgimtarët e tyre, janë edhe dosjet e të internuarve, në shumë raste me mungesa në dokumentacion. U propozua që dosjet e të internuarve të mund të kalohen përmes bashkëpunimit ndërinstitucional dhe VKM-së përkatëse, që ndihmon plotësimin e dokumentacionit të kërkuar dhe përshpejton dhënien e dëmshpërblimeve të internuarve në kampe me tela me gjemba. Po ashtu, do të përgatitet një propozim për pensionet e të internuarve, ku sugjerohet edhe rregullimi i kuadrit ligjor përkatës, që u mundëson të ardhura të internuarve në diktaturë.
Autoriteti e ka pjesë të punës së përditshme shërbimin e dokumentacionit ish-të përndjekurve dhe familjarëve të tyre, për arsye pensioni, dëmshpërblimi etj. Përballja e përditshme me qytetarët dhe problematikat e hasura prej tyre në vite nxitën një takim të tillë, me dëshirën e lehtësimit të procedurave dhe shkurtimit të kohës së përfitimit të dëmshpërblimit një kategorie shoqërore të dinjitetshme, së cilës i detyrohet dhe mban përgjegjësi shoqëria e sotme shqiptare”, thuhet në njoftimin e ndarë në rrjetet sociale.
RIVLERËSIMI
Në përgjigje të interesit të qytetarëve, për ata pensionistë, të cilët disponojnë dokumente shtesë lidhur me periudhën e internimit apo dëbimit, Instituti i Sigurimeve Shoqërore bën me dije se mund të bëjnë kërkesë për rivlerësimin e masës së përfitimit. “Bazuar në nenin 84, te ligjit nr. 7703, datë11.05.1993, ‘Për sigurimet shoqërore në Republikën e Shqipërisë’, i ndryshuar, ju keni të drejtë të kërkoni rishqyrtim të llogaritjes së pensionit, sa herë që mendoni se i plotëson kushtet për më shumë përfitim. Kërkesa për rishqyrtim përfitimi (pensioni) bëhet vetëm online në portalin e e-albania, nga vetë pensionisti ose një person i autorizuar prej tij, te shërbimi ‘Kërkesë për rishqyrtim përfitimi (pensioni’). Dokumentet origjinale shtesë që mund të keni (që vërtetojnë periudhat e përndjekjes politike), së bashku me një kopje të aplikimit duhet të dërgohen me postë në adresë të DRSSH ku ndodhet dosja juaj e pensionit”, sqaron ISSH.
DOSJET
Nga të dhënat zyrtare mësohet se kategoria e internim-dëbimeve përbëhet nga dy nënkategori, ajo e të dënuarve me internim në kampe me tela me gjemba përpara vitit 1954 dhe nënkategoria e të internuarve pas 1954. Në Ministrinë e Drejtësisë janë të protokolluara rreth 6000 dosje që bëjnë pjesë në nënkategorinë e internim-dëbimit dhe 2000 dosje të tjera që i takojnë nënkategorisë së të dënuarve në kampet me tela me gjemba.