Kanadaja në luftë me flakët, shtohen dhjetëra vatra të reja
Temperaturat deri në 50 gradë Celsius parashikohet të vazhdojnë
Kanadaja po përfshihet gjithnjë e më shumë nga zjarret më të tmerrshme në historinë e saj, që kanë shënuar viktima të shumta në vend.
Vala e të nxehtit ekstrem në vend po shkakton gjithnjë e më shumë zjarre në pyje, kryesisht në rajonin British Columbia, ku gjendja raportohet të jetë e rëndë. Ka ndërkohë të paktën 174 vatra zjarresh në pyje, nga të cilat 80 kanë shpërthyer gjatë dy ditëve të fundit. Zjarret janë “ndihmuar” edhe nga rreth 12.000 goditje rrufesh, të cilat kanë krijuar vatra të reja flakësh, sipas drejtuesit të njësisë së zjarrfikësve në British Columbia, Cliff Chapman. Vendi ka mbledhur shtabin e krizës, të drejtuar nga Kryeministri Justin Trudeau. “Ne do të jemi në gatishmëri për të ndihmuar”, tha Trudeau duke u konsultuar me Kryeministrin e krahinës British Columbia, John Horgan, si dhe me kryebashkiakun e drejtuesit e banorëve indigjenë të zonave të rrezikuara. Ndërsa ministri kanadez i Mbrojtjes, Harjitt Sajjan, deklaroi se një trupë e ndërhyrjes me 350 ushtarë si dhe një avion transporti e dy helikopterë të tipit “Chinook” janë nisur në rajon, për të mbështetur forcat e zjarrfikëseve. Helikopterët mund të transportojnë zjarrfikësit, aparatura të rënda ose mund të ndihmojnë për evakuimin e zonave. Ministri kanadez për Sigurinë Publike, Bill Blair, ka komentuar dukshëm i shqetësuar për situatën. “Këto zjarre në pyje tregojnë, që ndodhemi në fazën e parë të një vere të gjatë e të vështirë”, tha ai duke parashikuar një përkeqësim të situatës për shkak të temperaturave të larta. Afro 50 gradë Celsius është matur temperatura në Lytton, përpara se ky fshat kanadez të digjej tërësisht. Fshati Lytton, rreth 250 km në verilindje të Vankuverit, gjatë natës të enjten u evakuua, kur zjarri nisi të përhapet me shpejtësi. Fshati me 250 banorë është shkatërruar thuajse tërësisht. Në Lytton u regjistruan temperatura rekord prej 49,6 gradë Celsius. Kryeministri i British
Columbia, Horgan, u bëri thirrje banorëve, që të ndjekin udhëzimet e autoriteteve. Deri tani, prej zjarreve janë larguar nga vendbanimi mijëra vetë, por disa prej tyre konsiderohen të humbur. Edhe për ditët në vazhdim parashikohen temperatura shumë të larta në British Columbia. Paralajmërim nga temperatura ekstreme është dhënë edhe për krahinat Alberta, Saskatchevan dhe Manitoba, si dhe për pjesë të territoreve veriperëndimore dhe veriun e Ontarios. Autoritetet po tërheqin vëmendjen edhe nga rreziku i vërshimeve, për shkak të shkrirjes së dëborës në majat e maleve, si pasojë e të nxehtit ekstrem.