Samiti me Merkel, Rama: E trishtë që integrimi po shtypet nga nacionalizmat e BE-së
Kryeministri Rama: Nacionalizmat në BE po e ndërlikojnë shumë rrugëtimin tonë europian e po luajnë shumë rolin e kundërt me të
Kancelarja gjermane, Angela Merkel, ideatorja e Procesit të Berlinit, mblodhi dje në një video-konferencë për herë të fundit liderët e Ballkanit Perëndimor. Kancelarja Merkel gjatë fjalës së saj ka folur për rëndësinë e krijimit të një tregu të përbashkët rajonal.
Ajo tha se i sheh gjashtë shtetet e Ballkanit Perëndimor si anëtare të ardhshme të Bashkimit Europian për arsye strategjike, sipas “Reuters”. “Është në interesin e vetë Bashkimit Europian ta çojë procesin përpara”, tha Merkel. “Bashkëpunimi më i fortë rajonal, i promovuar që nga viti 2014, tashmë ka arritur sukseset e para, të tilla si një marrëveshje roaming që sapo ka hyrë në fuqi”, shtoi ajo. Bashkëpunimi për një treg të përbashkët rajonal dhe njohja e diplomave, ka shtuar Merkel, është një çështje që nuk është arritur ende, por, siç ka thënë, pritet që shpejt të ndodhë një gjë e tillë. Eliminimin e tarifave për shërbimet e roaming-ut në vendet e Ballkanit Perëndimor, Kancelarja Merkel e ka theksuar si një arritje mes këtyre shteteve. KRYEMINISTRI RAMA
Kryeministri Rama ishte sërish kritik ndaj Bashkimit Europian duke thënë se ka bllokuar procesin e integrimit të Ballkanit Perëndimor nga nacionalizmat brenda saj, ndërsa tha se vendet tona s’duhet të shndërrohen në karikaturë të BE-së. “Është e trishtë dhe të gjithë e dinë që ndërkohë procesi i integrimit europian i të gjithë rajonit në BE, që dikur shihej dhe tregohej si rruga e duhur për të nënshtruar nacionalizmat ballkanikë, është shndërruar tanimë në një proces që shtypet nga nacionalizmat e BE-së. Ja që, herë aty e herë këtu, nacionalizmat në BE po e ndërlikojnë shumë rrugëtimin tonë europian e po luajnë shumë rolin e kundërt me të. Megjithatë, siç thoshte edhe legjendari Donald Trump, “është kjo që është”, kësisoj na duhet të ecim përpara me atë çka kemi. E me këtë çka kemi, mendojmë vërtetë se Procesi i Berlinit dhe ajo çka është shpërfaqur prej tij është shtylla më e fortë e shpresës për të ardhmen. Dua të theksoj këtu atë çka pata shansin të ndaja drejtpërdrejtë me Kancelaren, se është absolutisht shumë e rëndësishme që të ecim më shpejt e, ndërkohë që ecim më shpejt, duhet të shmangim kurthin që të shndërrohemi në një karikaturë të Bashkimit Europian, që të bëhemi viktima të vetove të ndërsjella apo të nevojës për konsensus! Kjo nënkupton se tashmë objektivat i kemi shumë të qarta.
Ajo çfarë Ursula tha tani është një panoramë mjaft e qartë e asaj çka duhet të bëjmë: veprim për tregun e përbashkët rajonal, planin ekonomik dhe të investimeve e, po kështu, zbatim sa më të plotë të mundshëm të katër lirive të Europës. Ne nuk kemi iluzionin se të gjitha këto do të na shpëtojnë nga hendeku shumë, shumë i madh midis nesh dhe Bashkimit Europian, pasi sa për t’ju dhënë vetëm një shifër, në Planin e Bashkimit Europian 2021-2027, Ballkani Perëndimor do të marrë 507 euro për frymë. Pa bërë krahasime me të tjerët, por vetëm duke u krahasuar me Kroacinë, ajo do të marrë 5195 euro, natyrisht të mirëmerituara, për frymë; por ja që është kështu si është. Në fund dua thjesht ta përmbyll duke thënë se Shqipëria është tejet e bindur e do të inkurajojë sa më shumë të jetë e mundur përshpejtimin. Siç e thashë, nuk do të shohim të kemi konsensus me çdo kusht për çdo gjë. Do të kërkojmë gjithëpërfshirje të plotë në proces të gjithsekujt që kërkon ta përshpejtojë këtë proces. Me Serbinë dhe Maqedoninë e Veriut dua ta bëj shumë të qartë: nuk kemi vendosur të ndajmë gjësend, nuk kemi vendosur të ndajmë askënd, thjesht kemi vendosur të ecim sa më shumë që të jetë e mundur, duke përsëritur që të gjithë janë të mirëseardhur, por duke deklaruar përherë që nuk do të presim asnjërin”, tha Kryeministri Rama në fjalën e tij.