Gjonaj: U larguan 60 % e gjyqtarëve nga vetingu
“Strukturat e reja të posaçme kundër korrupsionit kanë filluar të flasin”
Ministrja e Drejtësisë, Etilda Gjonaj, tha se vullneti i qeverisë për Reformën në Drejtësi ka qenë i palëkundur në 5 vjet, reformë e cila largoi me veting një numër të madh gjyqtarësh e prokurorësh të paaftë, të korruptuar e të lidhur me krimin. “Nëpërmjet Reformës në Drejtësi po kryhet pastrimi rrënjësor i sistemit të drejtësisë nga elementët e korruptuar, joprofesionalë apo me lidhje të dyshimta me krimin nëpërmjet procesit të vetingut. Nga rreth 50 % të gjyqtarëve dhe prokurorëve të vetuar, më shumë se 60% prej tyre janë larguar nga sistemi. Nga ana tjetër është lufta ndaj korrupsionit dhe pandëshkueshmërisë, nëpërmjet ngritjes dhe funksionimit të strukturave të reja të posaçme kundër korrupsionit dhe krimit të organizuar. Ato tashmë kanë filluar të flasin në emër të drejtësisë penale të re me raste konkrete të procedimeve penale të nisura dhe përfunduara, dhe pasuri të sekuestruara si për raste brenda sistemit, por edhe jashtë saj”, tha ministrja Gjonaj.
Sipas saj, qeveria në mandatin e tretë do të rrisë transparencën për të luftuar korrupsionin. “Objektivi i qeverisë për mandatin e tretë është vijimi i betejës së luftës kundër korrupsionit dhe ndërtimit të një qeverisjeje sa më transparente dhe llogaridhënëse, nëpërmjet rritjes së aksesit të publikut, kontrollit të vendimmarrjes, së përdorimit të fondeve financiare, dixhitalizimit tërësor të shërbimeve, forcimit dhe konsolidimit të rezultateve të hetimit administrative të korrupsionit etj. Jemi të vetëdijshëm për të gjitha sfidat që kemi përpara, të cilat nuk janë të vogla, lufta kundër korrupsionit dhe përpjekjet në kuadër të reformës dhe të përpjekjet tona për të çrrënjosur korrupsionin në administratën publike hasen dhe mund të hasen me sfida të reja. Por, siç duket edhe në këtë takim, jemi shumë aktorë që kemi të njëjtin qëllim dhe na mbetet vetëm të rrisin bashkëpunimin për të fituar betejën me korrupsionin dhe të ndërtojmë një shoqëri me integritet. Besoj që ky takim do të jetë një shkëmbim real përvojash në nivel kombëtar, rajonal e ndërkombëtar në luftën kundër korrupsionit, si një sfidë tashmë të të gjithë shoqërive”, u shpreh Gjonaj.
Objektivi i qeverisë për mandatin e tretë është vijimi i betejës së luftës kundër korrupsionit dhe ndërtimit të një qeverisjeje sa më transparente dhe llogaridhënëse