Kushtetuesja i ndalon Policisë së Shtetit të përgjojë qytetarët
“Ligji vendos kufizim të së drejtës kushtetuese të jetës private. Përgjimi, vetëm me lejen e Prokurorisë dhe Gjykatës”
Gjykata Kushtetuese pezulloi dje zbatimin e nenit 131 të ligjit nr. 108/2014 “Për Policinë e Shtetit”, duke i ndaluar asaj të përgjojë qytetarët pa lejen e Prokurorisë dhe Gjykatës.
Në njoftimin për vendimin e saj, Kushtetuesja thotë se ky ligj së bashku me pikë 29/1 të nenit 6, vendos kufizim të së drejtës kushtetuese të jetës private, duke mos respektuar kriterin kushtetues sipas nenit 17 të Kushtetutës. Sipas saj, ligji prek njëherazi edhe parimin e sigurisë juridike në drejtim të saktësisë së ligjit dhe koherencës së rendit juridik. Kushtetuesja sqaron se ligji nuk rregullon në mënyrë shteruese dhe të qartë “masat e veçanta”, që zbaton Policia e Shtetit për përgjimet e qytetarëve. Shfuqizimi i këtij neni nga kushtetuesja erdhi pas padisë dhe kërkesës që bëri Avokati i Popullit dhe Komiteti Shqiptar i Helsinkit. Sipas tyre, ligji ishte antikushtetues pasi shkelte liritë dhe të drejtat e qytetarëve. Në seancën e zhvilluar në datë 1 korrik përfaqësuesit e Kuvendit në Gjykatën Kushtetuese argumentuan se ndryshimet u miratuan në funksion të parandalimit të veprave penale, por trupa gjykuese nuk e ka marrë aspak në konsideratë këtë pretendim të Kuvendit. Miratimi i këtij ligji në Kuvendin e Shqipërisë u shoqërua me debate të forta dhe akuza. Opozita akuzoi qeverinë se po tenton të përgjojë qytetarët në shkelje të të drejtave të tyre dhe parimeve kushtetuese. Ajo kërkoi që atëherë që deputetët të mos votonin një ndryshim të tillë në ligj, pasi kjo prekte në mënyrë të drejtpërdrejtë jetën e tyre private. Rrëzimi i nenit që u ndryshua në ligjin për Policinë e Shtetit për përgjigjet nga gjykata Kushtetuese duket se i ka dhënë të drejtë pretendimeve mbi nenin e shumë diskutuar në ligjin “Për Policinë e Shtetit”. Kujtojmë që edhe Presidenti i Republikës Ilir Meta i ktheu mbrapsht Kuvendit ndryshimet në ligjin ‘Për Policinë e Shtetit’ si në kundërshtim me Kushtetutën, cenonte liritë dhe të drejtat e qytetarëve, si dhe krijonte mundësi abuzimi ndaj qytetarëve. Madje edhe në Komisionin e Sigurisë në atë kohë pati debate për rolin që do të ketë neni i ri në këtë ligj. Por, ish-ministri i Brendshëm në atë kohë, Sandër Lleshaj, u shpreh se Policia shqiptare ka më pak atribute në krahasim me vendet e tjera të BE-së dhe ndryshimi i ligjit do t’i jepte një atribut më shumë”. Vendimi i djeshëm i Kushtetueses nënkupton se Policia nuk mund të kryejë përgjime të qytetarëve, në rrugë, ambiente publike mjetet e transportit publik, bisedat telefonike pa marrë më parë lejen e Prokurorisë ose Gjykatës.
NJOFTIMI I GJYKATËS Gjykata Kushtetuese e Republikës së Shqipërisë në seancën plenare publike të datës 01.07.2021 mori në shqyrtim çështjen me kërkues Avokatin e Popullit dhe Komitetin Shqiptar të Helsinkit, me objekt:
- Shfuqizimi i nenit 131 të ligjit nr. 108/2014 “Për Policinë e Shtetit”, të ndryshuar, si i papajtueshëm me Kushtetutën e Republikës së Shqipërisë dhe Konventën Europiane për të Drejtat e Njeriut.
- Pezullimi i zbatimit të nenit 131 të ligjit nr. 108/2014 “Për Policinë e Shtetit”, të ndryshuar, deri në hyrjen në fuqi të vendimit përfundimtar të Gjykatës Kushtetuese.
Në përfundim të shqyrtimit, Gjykata Kushtetuese vlerësoi se:
- Neni 131, i lidhur me nenin 6, pika 29/1, i ligjit nr. 108/ 2014 “Për Policinë e Shtetit”, të ndryshuar, vendos kufizim të së drejtës kushtetuese të jetës private, duke mos respektuar kriterin kushtetues “vetëm me ligj”, sipas nenit 17 të Kushtetutës, pasi ligji nuk rregullon në mënyrë shteruese dhe të qartë “masat e veçanta”, që zbaton Policia e Shtetit, duke prekur njëherazi edhe parimin e sigurisë juridike në drejtim të saktësisë së ligjit dhe koherencës së rendit juridik. Për këto arsye Gjykata Kushtetuese, VENDOSI: Pranimin e kërkesave. 2. Shfuqizimin e nenit 6, pika 29/1 dhe të nenit 131 të ligjit nr. 108/2014 “Për Policinë e Shtetit”, të ndryshuar.
3. Pezullimin e zbatimit të nenit 131 të ligjit nr. 108/ 2014 “Për Policinë e Shtetit”, të ndryshuar, deri në hyrjen në fuqi të vendimit përfundimtar të Gjykatës Kushtetuese. Vendimi përfundimtar i arsyetuar do të shpallet brenda afateve të parashikuara nga ligji nr. 8577, datë 10.02.2000 “Për organizimin dhe funksionimin e Gjykatës Kushtetuese të Republikës së Shqipërisë”, i ndryshuar.