Vasili: Reformën në Policinë politike nuk mund ta bëjnë ata që e shkatërruan atë

Nënkryetari i Lëvizjes Socialiste për Integrim, Petrit Vasili, deklaroi dje se reformën në Policinë e Shtetit nuk mund ta bëjnë ata që e shkatërruan atë. Përmes një mesazhi në “Facebook”, Vasili nënvizon Policia e Shtetit, është në mbështetje të krimit aq sa e kanë kthyer Shqipërinë në krye të botës për trafikimin e drogës. “Reformimi i Policisë me Ramën në krye është riciklimi i të njëjtës narkopolicie, që duan trafikantët! Inkriminimi kriminal i Policisë i mbështetur dhe mbrojtur fuqimisht nga Kryeministri dhe Policia është pa shërim. Viruset, që çuan në agoni Policinë janë vetë Kryeministri, ministri dhe drejtori i Përgjithshëm i Policisë, ndaj ato mund ta çojnë vetëm në vdekje përfundimtare dhe jo në shërim Policinë e Shtetit. Kjo Polici e çoi Shqipërinë në krye të botës për trafikimin e drogës dhe kthimin e Shqipërisë në bazë të krimit të organizuar edhe për Europën, SHBA-në, Amerikën Latine dhe Lindjen e Mesme, siç thotë raporti i Departamentit Amerikan të Shtetit. Kjo Polici dekonspiron dhjetëra aksione kundër trafikantëve dhe detyron institucionet ndërkombëtare të marrin vetë drejtimin e operacioneve edhe në Shqipëri. Kjo polici politike, që u hap autostrada trafikantëve arreston në mes të natës pa ligj qytetarë të thjeshtë dhe përfaqësues të opozitës vetëm se protestojnë. Reformimi i kësaj Policie të inkriminuar kriminalisht dhe politikisht është zero, kur bëhet nga po ata që e shkatërruan. Për sa kohë që Edi Rama është Kryeministër në Shqipëri, nuk ka Polici!”, shkruan Vasili.