Nga rindërtimi te projekti i Durrësit, Balla takon Princin e Kurorës së Abu Dhabit
Sekretari i Përgjithshëm i Partisë Socialiste, Taulant Balla, me ftesë të Presidentit Këshillit Botëror për Tolerancë dhe Paqe, po zhvillon një vizitë pune në Emiratet e Bashkuara Arabe. Zyra e shtypit pranë sekretarit të përgjithshëm të PS-së njofton se Balla zhvilloi një takim me ministrin e Shtetit, Sheikh Nahyan bin Mubarak Al Nahyan, ku diskutoi mbi bashkëpunimin e ngushtë mes dy vendeve. “Sheikh Nahyan është Komisioneri i Përgjithshëm i ‘EXPO Dubai’, ku Shqipëria do të ketë pavijonin e saj. Shqipëria dhe EBA kanë sot nivelin më të lartë të marrëdhënieve të tyre, që nga vendosja e marrëdhënieve diplomatike në vitin 1992", tha Balla. Gjatë takimit Balla i shprehu mirënjohjen për LT Sheikh Mohammed bin Zayed al Nahyan, Princ i Kurorës së Abu Dhabit, nën kujdesin e veçantë të Lartësisë së Tij, janë në proces ndërtimi 2000 shtëpi për familjet e prekura nga tërmeti i 26 nëntorit 2019. Nga ana e tij, Sheikh Nahyan bin Mubarak Al Nahyan u angazhua gjithashtu të ushtrojë ndikimin e tij për vendosjen e linjës direkte Abu Dabi–Tirana, duke arritur kështu në tri fluturime në ditë nga Emiratet në Shqipëri. Emiratet e Bashkuara Arabe dhe Shqipëria ndajnë një histori të rëndësishme bashkëpunimi për nismat humanitare dhe ne do të bashkëpunojmë me Emiratet Arabe edhe në nivel vendor me bashkitë e Qarkut Elbasan për disa projekte sociale. Gjatë kësaj vizite, Balla krahas takimeve me autoritete të Emirateve të Bashkuara Arabe në kryeqytetin Abu Dabi, ishte i ftuar edhe në intervista në studiot e “Al Arabiya”, “Al Hadath”, “Emirates News”. Tema kryesore të diskutimit ishin rritja e interesit për investime dhe turizmit në Shqipëri nga Arabia Saudite, Emiratet e Bashkuara dhe vendet e tjera mike të këtij rajoni. “Çdo ditë e më shumë po rritet numri i turistëve nga vendet arabe që po vizitojnë Shqipërinë përmes fluturimeve direkte nga Dubai, Sharjah, Riadi etj. Shqipëria është i vetmi vend në Mesdhe dhe Europë i hapur tërësisht për turistët nga këto vende, ndërkohë edhe pa pasur nevojë për viza. Shqipëria ofron një bregdet të shkëlqyer, hotele mjaft të mira, zona malore me peizazhe mahnitëse dhe mbi të gjitha, mikpritjen shqiptare”, theksoi Balla. Sipas tij, projekti i madh për Portin e Durrësit nga kompania ikonë e Dubait EMAAR është shprehja më kuptimplotë e një politike të suksesshme të Kryeministrit Rama në tërheqjen e investimeve strategjike në sektorin e turizmit elitar.