KLP pezullon prokurorin e Vlorës, Maksim Sota
Sota në “Arrest shtëpie”, paraqiti vetë kërkesën në Këshill
Këshilli i Lartë i Prokurorisë ka pezulluar nga detyra drejtuesin e Prokurorisë së Kukësit, Edmond Karriqi, i akuzuar dhe arrestuar nga SPAK nën akuzën e korrupsionit.
Në mbledhjen e djeshme, KLP ka miratuar me votën unanime të dhjetë anëtarëve të pranishëm për pezullimin nga detyra të prokurorit të Vlorës, Maksim Sota, i cili ndodhet nën arrest shtëpie pasi akuzohet nga SPAK për shpërdorim detyre. Gjithashtu, KLP ka caktuar drejtuesin e ri të Prokurorisë së Kukësit, prokurorin Xhevahir Lita, i cili deri më tani ishte prokuror në Tiranë. Drejtuesi i Prokurorisë së Kukësit, Edmond Karriqi, u arrestua më 30 qershor me urdhër të Prokurorisë Speciale kundër Krimit të Organizuar dhe Korrupsionit, pasi ishte filmuar duke marrë ryshfet shumën prej 2 mijë eurosh. Ai ishte në përgjim prej javësh nga hetuesit, derisa është kapur në Kavajë duke marrë shumën e mësipërme nga vëllai i një personi të arrestuar në këmbim të lehtësimit të masës së sigurisë. Dyshohet se prokurori ka përdorur këtë skemë edhe në raste të tjera, duke përdorur shoferin e tij si sekser. Bashkë me Karriqin u arrestua edhe shoferi i tij, Isuf Gega, si dhe dy persona të tjerë. Gjykata e Tiranës vendosi të shtunën të linte në qeli prokurorin Karriqi. Karriqi akuzohet nga SPAK-u për veprën penale “Korrupsioni pasiv”. AKUZAT NDAJ SOTËS Vendimi i KLP-së ndaj prokurorit Sota erdhi pasi ai rezulton i përfshirë në dosjen e gjerë hetimore kundër trafikut të drogës i koduar
“Shpirti”. Sota akuzohet se ka banuar në një ndërtesë, qiraja e së cilës paguhej, sipas dy të penduarve, nga kreu i grupit kriminal shqiptar, Ilirjan Duçellari (Zaimi), arrestuar në Shqipëri në korrik 2020. Në dosjen e SPAK thuhet se i penduari Mariglen Shusha ka deklaruar takime dhe biseda mes “drejtuesit të grupit kriminal, Ilirjan Duçellari (Lani) dhe prokurorit Maksim Sota, për probleme të ndryshme që kishte me drejtësinë dhe institucionet shtetërore, duke detajuar raste konkrete, për të cilat prokurori Maskim Sota ishte angazhuar për zgjidhjen e këtyre problemeve”. “Bashkëpunëtori i drejtësisë, Mariglen Shusha, ka deklaruar se prokurori Sota ishte shok me Lanin dhe se ishte në dijeni se bashkëshortja e tij qëndronte me fëmijën e sëmurë në Romë, të cilët i kanë ndihmuar shtetasit Orhan Duçellari dhe Ilirjan Ducellari”, thuhet në dosjen e SPAK. Vetë prokurori ka mohuar akuzat, duke thënë se banesa është në pronësi të vëllait të tij.