Kosovë, jepet dënimi i parë për dhunë seksuale gjatë luftës
Osmani: Përparim domethënës, por drejtësia e vonuar është e mohuar
Për herë të parë në Kosovë është dhënë një dënim për dhunën seksuale gjatë luftës, një vendim i Gjykatës së Prishtinës që është përshëndetur nga institucionet më të larta në Kosovë, por është kritikuar nga Beogradi si vendim politik.
Gjykata Themelore në Prishtinë ka dënuar me dhjetë vjet burgim, Zoran Vukotiqin, ish-rezervist i Policisë serbe, për krime lufte kundër popullatës civile, përkatësisht dhunim seksual ndaj një gruaje shqiptare në Komunën e Vushtrrisë. Sipas aktakuzës së ngritur, “Vukotiq, si pjesëtar i forcave policore të njësisë rezervë të Ministrisë së Punëve të Brendshme të Serbisë, në kundërshtim me rregullat e së drejtës ndërkombëtare humanitare, gjatë luftës në Kosovë, më 22 maj 1999, në bashkëkryerje me pjesëtarë të tjerë të forcave ushtarake, policore dhe paramilitare serbe, në territorin e Komunës së Vushtrrisë, ka marrë pjesë në dëbimin e popullatës civile shqiptare, kryerjen e dhunës fizike dhe psikike ndaj tyre, si dhe me përdorimin e dhunës dhe veprimeve të tjera çnjerëzore”. Presidentja e Kosovës, Vjosa Osmani, e ka mirëpritur dënimin e Vukotiq, duke e quajtur një përparim të rëndësishëm. “Një përparim domethënës sot – për herë të parë, një polic serb është dënuar për përdhunim gjatë luftës. Por mos të harrojmë se drejtësia e vonuar është e drejtësi e mohuar. Ne kemi nevojë për përgjegjësi dhe drejtësi për mijëra gra të tjera kosovare që nuk e kanë marrë ende atë”, ka reaguar Osmani. Ndërsa Kryeministri i Kosovës, Albin Kurti, ka deklaruar se dhuna seksuale është përdorur si mjet lufte nga forcat serbe gjatë luftës në Kosovë. “Mijëra gra e burra, vajza e djem kanë qenë viktima të këtij krimi. Ndërkaq dy dekada pas luftës, as edhe një person nuk është dënuar për një krim të tillë. Sot, pas 23 vitesh pandëshkueshmëri për krimin e dhunës seksuale, për herë të parë dënohet dikush. Zoran Vukotiqi është dënuar me 10 vite burgim për rastin e ushtrimit të dhunës seksuale ndaj një gruaje shqiptare në Vushtrri. Drejtësia është e domosdoshme, edhe në momente si ky kur vjen shumë vonë… Krimet e luftës nuk parashkruhen dhe nuk mund të kenë amnisti për këtë…”, reagoi Kurti. Por qeveria e Serbisë, përmes Zyrës së saj për Kosovën, e ka quajtur dënimin e ish-rezervistit serb në kohën e luftës, Zoran Vukotiq, si një vendim politik. Ndonëse qeveria serbe nuk ka ofruar asnjë kundërargument në këtë rast. “Ishte e qartë se vendimi kundër Vukotiq ishte marrë para se të konfirmohej zyrtarisht dhe se ai duhet të kishte shërbyer si shembull e argument për partitë politike në Prishtinë”, thuhet në reagimin e Zyrës për Kosovën në qeverinë e Serbisë. Kjo zyrë e ka quajtur politik edhe reagimin e Presidentes së Republikës së Kosovës, Vjosa Osmani.