PD ankimon vendimin e Celibashit, kryebashkiaku subjekt i dekriminalizimit
Partia Demokratike nuk e pranoi vendimin e Komisionerit Shtetëror të Zgjedhjeve Iirjan Celibashi, i cili nuk shkarkoi kryebashkiakun e Mallakastrës Qerim Ismailajn, pasi ky i fundit nuk kishte deklaruar në formular se kishte qenë i dënuar në Greqi. Selia blu ka ankimuar vendimin e komisionerit në hallkën tjetër të KQZ-së, në Komisionin e Ankesave dhe Sanksioneve.
Sipas demokratëve, kryebashkiaku i Mallakastrës Qerim Ismailaj është subjekt i ligjit të dekriminalizimit, pasi sipas tyre qytetari i parë i Mallakastrës ka gënjyer në formularin e vetëdeklarimit. “Konkretisht, nga shkresa e Prokurorisë së Përgjithshme, evidentohet se subjekti Qerim Ismailaj është dënuar me vendim të formës së prerë për kryerje e një vepre penale nga një autoritet gjyqësor i huaj. Konkretisht, rezulton se me vendimin nr.911/2000 të Gjykatës, i akuzuari Qerim Ismailaj është dënuar me 3 (tre) vjet burgim. Kaq informacion do të ishte i mjaftueshëm për KQZ-në për të vërtetuar që i zgjedhuri vendor është në kushtet e ndalimit për të kandiduar dhe për t’u zgjedhur, në momentin që subjekti deklarues ka kandidaur në zgjedhjet për organet e qeverisjes vendore të vitit 2019, pasi bie në parashikimin e nenit 2, pika 1, shkronja ‘c’ dhe ‘c’, të ligjit 138/2015. Këto dispozita e lidhin ndalimin për kandidim dhe zgjedhje vetëm me masën e dënimit penal të subjektit të deklarimit dhe jo me llojin e veprës penale apo me konvertimin e veprës së kryer në një shtet të huaj me atë të parashikuar nga legjislacioni penal i vendit tonë”, thuhet në ankimin e PD-së. PDja thotë se Qerim Ismailaj është akuzuar nga demokratët që në vitin 2019 me pretendimin se ka fshehur dënimin në Greqi në formularin e dekriminalizimit. Demokratët thonë se zgjedhja e tij në krye të Bashkisë Mallakastër është e padrejtë dhe e pa bazuar në dispozita ligjore dhe si e tillë duhet të shfuqizohet.
KQZ Javën e kaluar, Komisioneri Shtetëror i Zgjedhjeve, Ilirjan Celibashi, u shpreh se Ismailaj nuk është në kushtet e ndërprerjes së mandatit për shkak se ai nuk ka qenë në dijeni të dënimit që ka marrë në shtetin grek. “Bazuar në nenin 19, të Kodit Zgjedhor, vendos konstatimin se Qerim Ismailaj, kryetar i Bashkisë Mallakastër, qarku Fier, nuk përfshihet në kushtet e ndalimit të parashikuar nga ligji 138, vazhdimin e mandatit të zotit Qerim Ismailaj si kryetar bashkie. Kundër këtij vendimi lejohet ankimim në KAS brenda 3 ditësh. Ky vendim hyn në fuqi menjëherë”, tha Celibashi mes të tjerave. Ndërkohë, avokati i Ismailajt në mbrojtjen që bëri para komisionerit tha se gjyqi në Greqi është bërë pa praninë e klientit të tij. “Gjyqi në Greqi është zhvilluar në mungesë të tij dhe nuk evidentohet nga autoritet greke të drejtësisë që ai të ketë marrë dijeni për vendim gjyqësor të dënimit ndaj tij. Po ashtu, nga sistemi TIMS ai nuk figuron i ndaluar apo i dënuar nga autoritet e huaja apo ato shqiptare për ndonjë vepër penale dhe nuk ka asnjë urdhërkërkimi në ngarkim të tij. Ismailaj ka qenë i përshirë në konflikt, por nuk ka dëmtuar askënd, përveç se është dëmtuar rëndë vetë nga persona të tjerë”, u shpreh avokati.