“Mik i sinqertë i Shqipërisë”, Meta pritet nga Kryeministri Orban
Presidenti Ilir Meta u prit dje në Budapest nga Kryeministri i Hungarisë, Viktor Orban, të cilin e konsideron një mik të sinqertë të Shqipërisë. “Bisedë e hapur, e ngrohtë dhe produktive për shumë çështje me interes të përbashkët”, shkruan kreu i shtetit në rrjetet sociale lidhur me takimin me kreun e qeverisë hungareze. Presidenti i Shqipërisë ka publikuar pamje nga takimi me udhëheqësin e Hungarisë, vend ku Ilir Meta po zhvillon një vizitë zyrtare. “Përherë kënaqësi të takohem me Kryeministrin Orban, mik i sinqertë i Shqipërisë, të cilin e falënderoj për pritjen, si gjithmonë të veçantë. Bisedë e hapur, e ngrohtë dhe produktive për shumë çështje me interes të përbashkët, në dobi të qytetarëve tanë dhe forcimit të marrëdhënieve të shkëlqyera dypalëshe historike, tradicionale dhe premtuese për të ardhmen”, shkruan Presidenti i Republikës. Kreu i shtetit publikoi pamje nga takimi me homologun e tij hungarez, Janos Ader. Përmes një postimi në rrjete sociale, Presidenti u shpreh se e ardhmja e marrëdhënieve miqësore dhe historike mes Shqipërisë e Hungarisë është premtuese. Ai i shpreh mirënjohje Presidentit Ader për rikonfirmimin e vullnetit të përbashkët dhe faleminderit për pritjen e ngrohtë. “E ardhmja e marrëdhënieve të shkëlqyera miqësore, historike dhe tradicionale mes Shqipërisë dhe Hungarisë është jashtëzakonisht premtuese. Mirënjohje Presidentit Ader për rikonfirmimin e vullnetit të përbashkët dhe faleminderit për pritjen e ngrohtë”, shkruan Meta.
CEREMONIA Presidenti Meta mori pjesë dje në përurimin e bustit të Gjergj Kastriotit Skënderbeu në Budapest. Busti i Heroit tonë Kombëtar është vendosur në parkun qendror “Városliget” të Budapestit. Në ceremoni ishin të pranishëm edhe kryebashkiaku i Budapestit, Gergely Karácsony, si dhe kryetari i Bashkisë së Tiranës, Erion Veliaj. Siç shihet nga fotot, në këtë ceremoni ishte e pranishme edhe kryetarja e LSI-së, Monika Kryemadhi. Presidenti Meta dhe Presidenti i Hungarisë, János Áder, pas prerjes së shiritit përurues dhe zbulimit të veprës së skulptorit shqiptar Agim Rada, si dhe fjalimeve përshëndetëse, vendosën kurora në shenjë nderimi pranë bustit të Gjergj Kastriotit Skënderbeut. Kreu i shtetit theksoi se “nuk ka figurë historike, e cila simbolizon dhe mishëron më shumë rrënjët e miqësisë dhe të aleancës midis dy popujve tanë sesa Heroi ynë Kombëtar, Gjergj Kastriot Skënderbeu”.