Për herë të parë, turistë me avion edhe në Kukës
Ulet avioni me 67 pasagjerë i “Helvetic Airlines”. Klosi: Hyrja e re nga qielli do t’u shërbejë shqiptarëve nga të gjitha trevat
Gjashtëdhjetë e shtatë pasagjerë bënë këtë të premte fluturimin e parë zyrtar nga Zyrihu dhe zbritën në aeroportin ndërkombëtar të Kukësit “Zayed - Flatrat e Veriut”.
Fluturimi nga Zurihu për në Kukës u krye nga kompania ajrore zvicerane “Helvetic Airlines”. Bileta me gjithë taksa nga Zyrihu në Kukës ka kushtuar 99 euro, ndërsa nga Kukësi drejt Zyrihut do të kushtojë 69 franga zvicerane. Në ceremoninë zyrtare të fluturimit të parë nga Kukësi, ministri i Turizmit, Blendi Klosi, tha se aeroporti është një vepër e madhe qe do t’u shërbejë të gjitha trevave shqiptare, qytetarët e të cilave tashmë do të kenë një portë tjetër hyrëse shumë më afër destinacioneve të tyre. “Kjo hyrje e re nga qielli për gjithë shqiptarinë, e cila do t’u shërbejë shumë të gjitha trevave shqiptare, të dyja anëve të kufirit e po ashtu dhe shqiptarëve të Malit të Zi”. Rëndësinë e aeroportit të Kukësit në zhvillimin e turizmit në të dyja anët e kufirit, por edhe të ekonomisë e theksuan edhe kryetari i Bashkisë Kukës, Safet Gjici dhe kryetari i Komunës së Prizrenit, Mytaher Haskuka. Kryeministri Edi Rama e konsideroi aeroportin e Kukësit si portën e dytë të qiellit të Shqipërisë për fluturimet komerciale. “Me aeroportin e ri ndërkombëtar ‘ZAYED-Flatrat e Veriut’, ku sot ulet nga Zyrihu në tokën e Kukësit avioni me udhëtarë i ‘Helvetic Airlines’ dhe hapet porta e dytë e qiellit të Shqipërisë për fluturimet komerciale, ju uroj një të premte të mbarë”, shkruan Rama në një postim në rrjetet sociale bashkëngjitur fotos së aeroportit të inauguruar në muajin prill. Aeroporti i Kukësit ka një pistë prej 2.2 kilometrash të gjatë, e projektuar të mbajë 3 avionë njëkohësisht, si dhe kullën e vrojtimit. Brenda një ore 4 avionë mund të nisen nga ky aeroport. Terminali zë një faqe prej 3500 m2, ka 2 portat hyrëse dhe brenda tij edhe një zonë muzeale në përkujtim të luftës së Kosovës, e cila ishte edhe pikënisja e këtij aeroporti, si dhuratë e Emirateve të Bashkuara për të pritur ndihmat për refugjatët.