Basha: Mund të lash duart me Tushën, por peshku qelbet nga koka
Çupi: Çdo tender sot jepet pa garë, me 99% të vlerës limit dhe me një dëm ekonomik te vërtetuar nga KLSH në nivelin e 7 miliardë eurove
Partia Demokratike akuzon Kryeministrin Edi Rama si frymëzues të modelit të korrupsionit në Policinë e Shtetit dhe në pushtetin lokal.
Kryedemokrati Lulzim Basha reagoi dje menjëherë pas mbledhjes që kryesocialisti Rama zhvilloi me drejtuesit e pushtetit lokal, ku përjashtoi kryebashkiakun e Lushnjës, Fatos Tushe, nga Partia Socialiste. Por sipas Bashës, ndonëse Rama bën gjeste të tilla, shqiptarët e dinë se kryebashkiaku i arrestuar as nuk do të guxonte të bënte korrupsion nëse fryma e korrupsionit nuk do të përcillej nga Rama. “Mund të lash duart me një kryebashkiak të korruptuar apo të bësh koka turku bedelët e tu në atë sallë, por shqiptarët e dinë mirë se peshku qelbet nga koka”, shkroi Basha në “Facebook”.
TENDERËT Ndërkohë, në një dalje publike, deputetja e zgjedhur Dhurata Çupi reagoi për korrupsionin me tenderë të pushtetit lokal. Ajo e përkufizoi takimin e zhvilluar dje nga Kryeministri me shprehjen popullore: “Peshku qelbet nga koka”. Në një deklaratë për mediat, në emër të PD-së, ish-deputetja Dhurata Çupi theksoi se pas shfaqjes tallëse të ditës së djeshme me Policinë, Edi Rama sot dhuroi një tjetër shfaqje me drejtuesit e komanduar të pushtetit vendor. “’Bëni si them unë, por mos bëni si bëj unë’, u tha Rama të emëruarve të tij në bashkitë e vendit”, thekson Çupi. Sipas
saj, qytetarët shqiptarë e dinë se njerëzit e ndershëm të mbledhur në atë sallë numërohen me gishtat e dorës, megjithatë të dëgjosh Ramën që bën moral për tenderët dhe korrupsionin, nuk është gjë tjetër veçse një nivel i ri i teatrit të absurdit. “Sepse shkelësi i ligjit nuk mund të vendosë drejtësi, aq më pak kritere ndershmërie në zbatimin e ligjeve mbi prokurimet publike. Qeveria Rama, në kundërshti me çdo normë kushtetuese dhe ligjore, ka miratuar 9 ligje të bëra apostafat për klientët pranë Kryeministrit, duke e kthyer kështu korrupsionin në nivelin e kapjes së shtetit, sikurse vërtetohet nga raportet e “Transparency International”, tha ajo. Çupi u shpreh se qeveria Rama është kampione e prokurimeve publike të dhëna pa garë, ku sipas saj, vetëm 30% e prokurimeve në vend jepen pa garë që nga viti 2014. “Fakt i provuar nga Komiteti Auditues i BE-së që 1 në 3 jepet pa garë dhe kjo nuk ka lidhje me pushtetin vendor, por me te gjithë qeverisjen Rama. Çdo tender sot jepet pa garë, me 99% të vlerës limit dhe me një dëm ekonomik të vërtetuar nga KLSH në nivelin e 7 miliardë eurove”, deklaroi ish-deputetja demokrate. Çupi thekson se Rama bëri një ligj antikushtetues për shembjen e teatrit, me emër dhe mbiemër të ortakut me të cilin do të rrëmbente pronën publike. “Ai që falsifikoi firmë e Sekretarit të Shtetit të Delaware për të vjedhur 20 milionë euro për një kilometër rrugë, ai që i kontraktoi miliona euro me kontrata sekrete, ai që praktikat korruptive nuk i ndali as në kohë pandemie dhe as gjatë fatkeqësisë së tërmetit, ai që e renditi Shqipërinë të dytën në botë për nivelin e ryshfetit, sot po përpiqet të lajë duart me korrupsionin, duke bërë koka turku ushtarët e tij nëpër bashki”, tha ajo. “Fatkeqësia e Ramës është se nuk i gënjen dot më qytetarët. Shqiptarët e ndjejnë në xhepat e tyre, në tryezat e tyre, peshën e korrupsionit që ka varfëruar çdo familje dhe e ka bërë edhe më të zymtë perspektivën europiane të Shqipërisë. Shqiptarët e dinë që peshku qelbet nga koka dhe se një regjim që vjedh zgjedhjet nuk mund të ofrojë gjë tjetër veçse një qeverisjes të korruptuar”, thekson më tej Cupi.