Ana Kodra, talenti shqiptar që synon të prezantohet si kantautore në Amerikë
Liceistja 14-vjeçare shpalos ambiciet në tregun ndërkombëtar të muzikës me pesë krijime të sajat. Agjencia menaxhuese: Të arrira!
Ka yllin në ballë, atë që ndoshta shumë e kërkojnë me sforco për ta pasur e për të qenë në majë të skenës. Ndërsa ajo, e lindur për skenën, ka gjithë meritën ta ketë të vetën, për të përhapur magjinë e muzikës përmes talentit që di të përcjellë.
Ana Kodra është një adoleshente që hapat e karrierës i ka nisur që kur ishte e vogël. Pjesëmarrëse në festivale për fëmijë, ajo ka rrëmbyer çmime të rëndësishme, dalluar veçanërisht për zërin e saj të veçantë. Një zë i plotë, i fuqishëm, në trupin e një imëtakeje që thoshte shumë. Kur flasim për Ana Kodrën, do na kujtohet pa dyshim edhe pjesëmarrja e vogëlushes, atëherë në moshën 10-vjeçare, në spektaklin “The Voice Kids Albania 2018”, e cila na çuditi të gjithëve jo vetëm me zërin e saj, por me një performancë të shkëlqyer. Brenda një minute interpretim, Ana arriti të prezantohet me tri zëra njëherësh, - e rrallë për moshën e saj, - video e cila në kanalin “Youtube” ka marrë mbi 2 milionë shikime.
Sot në diapazonin artistik të fituar falë një shkolle të mirëfilltë arti si Liceu Artistik “Jordan Misja” në Tiranë, ku ajo studion për piano, Ana arrin të na surprizojë me të tjera ambicie të sajat. Falë pasionit dhe këmbënguljes për të tejkaluar pritshmëritë, Ana Kodra së fundi na prezantohet edhe si kantautore. Një arritje që bën bashkë talentin me dijet e përftuara.
E pra, pas dhjetëra çmimesh të para në festivale kombëtare dhe ndërkombëtare, titujsh në kompeticione të rëndësishme gjatë periudhës së pandemisë, pjesëmarrje në spektakle televizive si e ftuar speciale, Ana Kodra, ky yll shqiptar i muzikës pop, do të prezantohet në Amerikë me pesë krijime të saj. Një e ardhme me sa duket e shkruar për Anën, e cila ëndrrën e saj kërkon ta bëjë edhe më të madhe në një vend mundësish të mëdha dhe mbështetës si Shtetet e Bashkuara të Amerikës. Sipas agjencisë amerikane që menaxhon talentin shqiptar jashtë kufijve, këngët e Anës janë të një performance të arrirë, çka i jep më shumë shanse 14-vjeçares shqiptare të synojë tregun e muzikës amerikane, për të mundur të prezantohet si kantautorja më e re shqiptare në spektaklet më me emër në SHBA.
E në këtë rrugëtim ambicioz, dëshira e talentit shqiptar është të bëhet e famshme si këngëtaret me emër shqiptare si Dua Lipa, Rita Ora dhe Bebe Rexha. Sepse Ana e ka yllin që meriton të lartësojë emrin e saj në kontinentin e mundësive.