Mançini: Nuk mjafton kaq, të argëtohemi në finale
“Pas Spanjës festuam për Spinacolën, çfarë qetësie Zhorzhinjo…”
“E besoja, sepse besoj gjithmonë te gjërat pozitive. Megjithatë, janë treguar të zotë edhe lojtarët, sepse kështu kanë vepruar edhe ata që nga momenti i parë, pavarësisht nuk ishte kaq e lehtë”.
Roberto Mançini i është përgjigjur në këtë mënyrë pyetjes së parë në konferencën për shtyp në vigjilje të finales së “Euro 2020” ndaj Anglisë, e programuar për mbrëmjen e nesërme në “Wembley”. Dhe pyetja i referohej një videoje të publikuar nga “Vivo Azzurro” lidhur me një frazë të Federiko Bernardeskit: “Mendoj se ka pasur vetëm një të çmendur 3 vite më parë që tha se mund të arrinim në këtë pikë dhe është trajneri Mançini…”.
E kujtoni debutimin në Romë?
Një ditë të bukur ishim në Romë dhe nisi të rikthehej publiku në stadium. Një kujtim shumë i bukur.
Po festimin te goli i Lokatelit?
Goli që u hapi dyert 1/8ave. Duke mposhtur Zvicrën, ishim në fazën tjetër dhe nuk rezultoi aspak një ndeshje e lehtë.
Edhe Insinje shënoi një të bukur…
Një gol shumë i rëndësishëm, na dha pak qetësi, edhe pse më prapa pësuam atë penalltinë. Le të themi që pa VAR mund të ishte dhënë…
Kalojmë te një gol juaji: ai me takë kundër Austrisë...
Mund ta kisha goditur vetëm ashtu.
Me Austrinë përqafuat Vialin pas rrjetës së fitores...
Ishte ndeshja e parë me eliminim direkt, një ndeshje e ndërlikuar. Ishte një përfaqim çlirues.
Çfarë mendoni për gjakftohtësinë e Zhorzhinjos te penalltia?
Ka një qetësi… Është fantastik kur godet, ishim shumë të qetë edhe pse te penalltitë mund të ndodhë gjithçka.
Pas fitores nuk u përmbajtët me festimet.
Kujtuam Spinacolën, mbrojtësin më të mirë të Europianit.
Ndiej keqardhje që nuk ndodhet me ne për të luajtur finalen, por mbetet fakt që ishte më i miri.
Tani keni Anglinë në finale.
Kanë mbërritur me meritë deri këtu, është një skuadër që ka lejuar shumë pak, një skuadër solide, do të jetë një finale e bukur. Por, nuk mjafton kaq. Në finale dua të argëtohemi.