Aleanca padit Sorecën në SPAK: Të hetohet për Teatrin
“Presidenti i Republikës ta shpallë Luiggi Soreca ‘non grata’
Aleanca për Mbrojtjen e Teatrit ka depozituar në SPAK një kallëzim për ambasadorin e BE-së në Shqipëri, Luigi Soreca. Aleanca e akuzon Sorecën për ndikim të paligjshëm në Gjykatën Kushtetuese në favor të kryebashkiakut të Tiranës, Erion Veliaj, në lidhje me çështjen e Teatrit. Përfaqësuesja ligjore e Aleancës, Adriana Kalaja, në një prononcim për mediat, teksa hedh hije dyshimi dhe ngre pikëpyetje mbi kohën dhe mënyrën e takimit të Sorecës me kreun e Kushtetueses Vitore Tusha, tha se Aleanca i ka kërkuar Presidentit Ilir Meta shpalljen “non grata” të ambasadorit të BE-së në Shqipëri. Ndërkohë, në fillim të muajit korrik, Gjykata Kushtetuese hodhi poshtë të gjitha pretendimet e Aleancës për Mbrojtjen e Teatrit, e cila akuzon se kryetarja e këtij institucioni, Vitore Tusha, është takuar në mënyrë të fshehtë me ambasadorin e BE-së, Luigi Soreca. Përmes një shkresë, Gjykata Kushtetuese i ka kthyer përgjigje avokates Adriana Kalaja dhe e sqaron se takimi me ambasadorin Soreca ka qenë i planifikuar dhe është zhvilluar në vazhdën e disa takimeve të mëparshme. Sipas Gjykatës, në takim nuk është diskutuar për çështjen e Teatrit, por ka pasur në fokus rivënien në funksionim të Gjykatës Kushtetuese mbështetjen e veprimtarisë së saj, si dhe zbatimin e ecurinë e Reformës në Drejtësi në Shqipëri.
PJESË NGA KËRKESA Shqetësimi i drejtë dhe shumë i madh i Aleancës për Teatrin ishte se, jo vetëm që ky takim u mbajt i fshehtë si nga Gjykata Kushtetuese, ashtu dhe nga ambasadori Soreca, por edhe vërtetoi dyshimet tona të arsyeshme në lidhje me ushtrimin e ndikimit të paligjshëm në pushtetin gjyqësor. Aleanca
për Mbrojtjen e Teatrit vazhdon të insistojë në pyetjen se: Përse takimi midis kreut të delegacionit të BE-së me kreun e Gjykatës Kushtetuese nuk mund të shihen dhe trajtohen: Si çështje private; Jashtë kushtit zyrtar të transparencës formale; Jashtë rezonimit publik. Kërkojmë nga SPAK hetimin e plotë dhe të gjithanshëm të kësaj çështje për të dhënë përgjigje mbi pyetjet e drejta dhe legjitime tonat se: A ka qenë i planifikuar ky takim? Ku është protokolluar kërkesa për takim? Pse u zhvillua pikërisht në datën e seancës së Teatrit? Cili ka qenë objekti i bisedimeve? Ku është protokolluar dhe kush ka mbajtur diskutimet midis palëve? Pse nuk u bë publik takimi? Pse nuk u bë publike objekti i bisedimeve? Gjithashtu, kërkojmë nga struktura e SPAK konfiskimin e të gjithë kamerave brenda dhe jashtë godinës së Gjykatës Kushtetuese si dhe të gjithë aparaturave të komunikimit si celularë, kompjuterë, laptopë dhe çdo provë tjetër të personave të dyshuar, të ambasadorit Soreca dhe Erion Veliajt, prova të cilat do të shërbejnë në zbardhjen e kësaj ngjarje të rëndë në cenim të pavarësisë së pushtetit gjyqësor. Për këtë arsye, i kemi nisur kërkesë si Presidentit të Republikës, ashtu edhe ministres së Jashtme dhe të Europës, Olta Xhaçka, shpalljen e z. Soreca ‘non grata’. Po kështu, të gjitha pretendimet tona ia kemi përcjellë Parlamentit Europian dhe disa eurodeputetëve, ku kemi kërkuar, “Fillimin e një hetimi administrativ, duke thirrur në interpelancë z. Luigi Soreca dhe, nëse vërtetohen të gjithë dyshimet tona të arsyeshme, të procedoni me heqjen e imunitetit dhe lirimin nga kjo detyrë”. Bazuar në gjithë paraqitjen e mësipërme, është e vërtetuar katërçipërisht se z. Soreca ka ushtruar ndikimin e paligjshëm në Gjykatën Kushtetuese për qëllime korruptive në favor të kryetarit të Bashkisë Tiranë, Erion Veliaj.