Goditet rrjeti ndërkombëtar i trafikut të emigrantëve shqiptarë drejt SHBA e Britanisë
Sa ishin pagesat e emigrantëve shqiptarë dhe si bëhej trafiku i tyre përmes Spanjës nëpërmjet femrave të rekrutuara
Një rrjet i gjerë i trafikut të emigrantëve nga Shqipëria dhe Kosova për në Britaninë e Madhe dhe në Shtetet e Bashkuara të Amerikës është goditur nga autoritetet spanjolle mbështetur nga Europol dhe policitë e disa shteteve europiane.
Gjatë operacionit, agjentët e Policisë arrestuar 46 persona, 19 prej të cilëve në Spanjë, ku ishin bazat e organizatës kriminale. Një total prej 14 personash janë arrestuar në Valencia, tre në Barcelona dhe dy në Salou. Agjentët kanë zbuluar ekzistencën e grave spanjolle që shoqëruan emigrantët në udhëtimin e tyre dhe që pretenduan se ishin të dashurat, në mënyrë që të shmangej kontrolli i kalimit në kufi. Hetuesit kanë zbuluar rreth 400 shqiptarë me dokumente false në aeroporte në vende të ndryshme, si dhe janë sekuestruar 1 000 dokumente të falsifikuara.
SHTRIRJA E OPERACIONIT Përveç Spanjës, operacioni kundër falsifikimit të dokumenteve dhe trafikut të emigrantëve për në SHBA dhe Britani u shtri edhe në Shqipëri, Kosovë, Francë, Portugali, Itali, Austri, Irlandë, Holandë dhe në Mbretërinë e Bashkuar. Sipas autoriteteve spanjolle, Shtetet e Bashkuara të Amerikës, Shqipëria dhe Kosova kanë luajtur një rol thelbësor për çmontimin e organizatës. Hetimet filluan kur agjentët e Policisë Kombëtare të Spanjës zbuluan një përdorim në rritje të dokumenteve të rreme të përdorura gjoja nga emigrantët shqiptarë për të kaluar kufirin në aeroporte të ndryshme në Spanjë. Këto fakte u bënë të ditura vendeve të tjera të Bashkimit Europian, që gjithashtu zbuluan këtë formë kriminale, për të cilën Europol koordinoi të gjithë operacionin midis shteteve. Ndërkohë, Departamenti Amerikan i Sigurisë Kombëtare kishte sinjalizuar më herët ekzistencën e “një objektivi me vlerë të lartë në Spanjë”. Nga atje i dyshuari dhe bashkëpunëtorët e tij lehtësuan hyrjen e paligjshme të emigrantëve përmes aeroporteve të ndryshme në Spanjë dhe Portugali për në Mbretërinë e Bashkuar. “TENTAKULAT”
E RRJETIT Hetuesit zbuluan një grup falsifikuesish në Kosovë me katër baza falsifikimit të dokumenteve të rreme, të cilat më vonë ia dorëzuan një grupi të dytë njerëzish të quajtur “korrierë”, të cilët i shpërndanë ato në të gjithë Kosovën dhe Shqipërinë. Qeliza e tretë e organizatës ishte në Mbretërinë e Bashkuar, të cilët ishin përgjegjës për fluturimet dhe pritjen e personave të trafikuar. Për më tepër, u mësua se një grup tjetër vepronte në ishullin St. Marteen (Holandë) në Karaibe, ku ata menaxhonin dërgesat e emigrantëve shqiptarë në Shtetet e Bashkuara me dokumentet e rreme të marra në Kosovë. Nga Spanja, grupi i pestë vepronte në zonën e Levantes, të cilët përmes aeroporteve spanjolle dhe portugeze, bënin të mundur kalimin e emigrantëve me karta false identiteti franceze për të udhëtuar drejt Britanisë. Grupi i identifikuar në Spanjë operoi në një mënyrë të re pasi që udhëheqësi i qelizës atje punësoi gratë spanjolle që shoqëronin të trafikuarit. Gjithashtu, gratë e rekrutuara merreshin me blerjet e shumta të biletave të avionëve në mënyrë që kreu i grupit të mos zbulohej. Për këtë arsye, ata morën një paradhënie për të paguar biletën dhe shpenzime të vogla dhe pjesa tjetër e pagesës u bë nga familja e personit të trafikuar pasi të kishin arritur në destinacionin e tyre. Në total ata paguanin rreth 2,000 euro për dokumentacionin dhe udhëtimet.