NEGJITHEVENDIN Legalizimet, emrat e rinj që marrin tapinë

Kadastra miraton listën e re me mbi 400 familje që marrin tapinë për shtëpinë pa leje. Gazeta boton emrat e përfituesve në Tiranë dhe rrethe, si dhe procedurën e dokumentet që duhen

Agjencia e Kadastrës ka publikuar një ditë më parë emrat e qytetarëve që kanë gati lejen e legalizimit dhe mund të paraqiten në sportelet e Agjencisë për ta tërhequr atë.

Gazeta boton sot emrat e përfituesve në Tiranë dhe rrethe që në përfundim të këtij procesi do të pajisen me certifikatë pronësie. “Drejtoria Vendore e Kadastrës bën afishimin publik për qytetarët, në zbatim të VKM-së nr.1040 datë 25.11.2020 ‘Për përcaktimin e rregullave të zbatimit të kritereve të legalizimit dhe miratimin e modelit të aktit të legalizimit’, për ndërtime pa leje ka marrë në shqyrtim kërkesën e qytetareve të mëposhtëm. Publikimi i kërkesave për afishim të subjekteve që po trajtohen nga ASHK bëhet për një periudhë 30-ditore”, thuhet në njoftimin e Agjencisë.

AFATET Në përfundim të afatit 30-ditor nisin edhe procedurat e regjistrimit. Ligji i ndryshuar përcakton një afat 2-mujor për përmbylljen e kësaj praktike dhe pajisjen me dokumentin e pronësisë. “ASHK-ja, brenda 60 ditëve nga përfundimi i procedurave të kualifikimit, ligjëson ndërtimin, duke respektuar dispozitat e legjislacionit në fuqi për regjimet pasurore martesore, sipas gjendjes së momentit të aplikimit për ligjësim. Poseduesi i ndërtimit pa leje ka të drejtë të kërkojë përfundimin e procedurave administrative brenda 30 ditëve, nga paraqitja e kërkesës, kundrejt pagesës së një tarife shërbimi shtesë”, specifikohet në ligj.

TARIFAT Me ndryshimet e bëra po ashtu, për të marrë lejen e legalizimit qytetarët nuk do të jenë më të detyruar që të kryejnë pagesën e taksës së ndikimit në infrastrukturë. Kjo tarifë është hequr nga lista e detyrimeve, që qytetarët duhet të përmbushin para se të kenë në duar dokumentin e pronësisë. Taksa e ndikimit në infrastrukturë është 0.5 për qind e vlerës së investimit. Konkretisht, për një banesë me vlerë 5 milionë lekë, tarifa është 25 mijë lekë. Familjet në proces legalizimi kishin detyrimin për të kryer fillimisht këtë pagesë, gjë e cila ka sjellë vonesa në marrjen e lejes.