Varianti “Delta”, sa na mbron imuniteti natyror
Mjekët nuk përjashtojnë mundësinë e qarkullimit të variantit të ri edhe në vendin tonë, simptomat që shfaqin pacientët
Ende asnjë rast i konfirmuar zyrtarisht me variantin “Delta”, por mundësia e qarkullimit mbetet e lartë.
Ajo çka shërben si kambanë alarmi për ekspertët janë shenjat që kanë shfaqur disa prej pacientëve të infektuar, të cilat janë të ngjashme me virusin Indian, apo atë që njihet me emrin “Delta” si dhimbja e kokës, e fytit si edhe rrjedhja e hundëve. Me simptoma të tilla, janë raportuar disa raste edhe në vendin tonë. Kjo ka bërë që autoritetet të dërgojnë mostrat në Gjermani, nga ku pritet konfirmimi nëse bëhet fjalë për variantin e ri apo jo.
MJEKËT
Mjekët pranojnë se ka dyshime të forta mbi mundësinë e qarkullimit të këtij virusi në vendin tonë. Mjeku infeksionist Gent Stroni tregon se shenjat variantit të ri janë shumë të ngjashme me ato të virozëve të stinës, ndaj mjekët që vënë re këto simptoma duhet të tregohen vigjilentë për të referuar rastet. “’Delta’ duhet të jetë dhe në vendin tonë, por nuk arrijmë dot ta vërtetojmë se analizat kërkojnë konfirmim jashtë vendit tonë. Shfaq dhimbje koke, rrufë, dhimbje sysh, sy të skuqur, tharje të mukozave të fytit”, tha doktori për “Ora News”. Sakaq, më herët edhe ministrja e Shëndetësisë Ogerta Manastirliu tha se ka sinjale të pazakonta, duke lënë të kuptohet mbi mundësinë e qarkullimit të këtij virusi edhe në vendin tonë. “Në Institutin e Shëndetit Publik janë duke u bërë analizat dhe është vlerësuar që një seri mostrash, të cilat janë identifikuar si sinjale të pazakonta, të çohen në Laboratorin e Referencës në Gjermani, për të bërë vlerësimet e mëtejshme dhe për t’u bërë sekuencimi genomik, në mënyrë që të shihet nëse ka një qarkullim të mundshëm të variantit ‘Delta’ në Shqipëri”, tha Manastirliu.
SITUATA Java që lamë pas, solli
edhe një rritje të lehtë të rasteve të konfirmuara pozitive me COVID-19, gjë që shtoi dyshimet mbi prezencën e variantit të ri. Edhe pse flitet prej javësh për këtë kërcënim të ri, autoritet shëndetësore në vend nuk kanë ndërmarrë asnjë masë shtesë. Kjo nuk ndodhi as kur vendet fqinje si Maqedonia e Veriu, por edhe Greqia konfirmuan rastet e reja me mutacionin e ri. Në këto kushte, mundësia e qarkullimit të këtij varianti është e lartë dhe të gjithë treguesit të çojnë në të njëjtën përfundim, se ‘Delta’ ka mbërritur edhe në vendin tonë. Lidhur me situatën epidemiologjike, në 24 orët e fundit janë kryer 2658 testime, nga të cilat kanë rezultuar pozitivë me COVID-19, pesë qytetarë në Tiranë. Me rëndësi është që edhe dje nuk është regjistruar asnjë humbje jete. “Aktualisht janë 89 pacientë aktivë me COVID-19 në të gjithë vendin. Në Spitalin Infektiv po marrin trajtim spitalor të specializuar 7 pacientë. Në 24 orët e fundit nuk ka asnjë humbje jete me Sars-Cov2 pozitiv. Janë shëruar 2 qytetarë gjatë 24 orëve të fundit, duke e çuar numrin e të shëruarve në 130,052 që nga fillimi i epidemisë”, thuhet në njoftimin e Ministrisë së Shëndetësisë.