Tenderi i uniformave, Policia u dërgoi kërkesë 11 subjekteve
Në dosjen e SPAK-ut, kur përshkruhen rrethanat e faktit në hetimin e kryer për tenderin e uniformave të Policisë, rezulton se nga ana e Autoritetit Kontraktor, që është Policia e Shtetit, u është dërguar kërkesë 11 subjekteve që kanë aktivitet në këtë fushë duke pasqyruar ofertat e ofruara me çmimet për njësi. Më datë 15.03.2019 është protokolluar, si dhe më datë 01.04.2019 u është dërguar kërkesë subjekteve të licencuara në këtë fushë, me qëllim llogaritjen e vlerës së kontratës për uniformën për vitet 2019-2023, e ndarë në 6 lote, përgatitur nga grupi i punës, miratuar nga drejtori i Përgjithshëm i Policisë së Shtetit. Me urdhrin e drejtorit të Përgjithshëm të Policisë së Shtetit, i janë deleguar kompetencat zëvendësdrejtorit të Përgjithshëm të Policisë së Shtetit dhe drejtorëve të departamenteve për të nënshkruar dokumente që dalin nga Drejtoria e Përgjithshme e Policisë së Shtetit. Ndërkohë, në dosje sqarohet edhe fakti se si u shkrinë në një fond të vetëm, tri fondet me objekte të ndryshme të tenderit. RRETHANAT E ÇËSHTJES SË HETUAR NGA SPAK Në lidhje me hetimin për procedurën e prokurimin të zhvilluar në Agjencinë e Blerjeve të Përqendruara në Ministrinë e Brendshme, me objekt “Blerje dhe shpërndarje e uniformave dhe këpucëve të Policisë së Shtetit” për 4 vjet, me fond limit 2.800.345.570 lekë, zhvilluar me datë 11.05.2020 sipas organit procedues kanë rezultuar rrethana fakti si më poshtë:
Në vijim nga grupi i punës së DPPSH-së, Vojsava Çopani, Zenel Hyka, Marsida Gargaj, është mbajtur pasqyra e testimit të çmimeve të tregut për efekt të llogaritjes së kontratës për procedurën “Blerje uniforme për Policinë e Shtetit për vitet 20192020”, dakordësuar nga drejtori i Mbështetjes Logjistike, Janaq Xhelili, drejtori i Departamentit për Shërbimet Mbështetëse, Theodhori Gravani, miratuar nga drejtori i Përgjithshëm i Policisë së Shtetit. Sipas kësaj pasqyre, testimi i tregut rezulton se nga ana e Autoritetit Kontraktor u është dërguar kërkesë 11 subjekteve që kanë aktivitet në këtë fushë duke pasqyruar ofertat e ofruara me çmimet për njësi sipas subjekteve që u janë përgjigjur ftesës së Autoritetit Kontraktor, çmime për njësi me TVSH sipas artikujve të uniformave të Policisë së Shtetit. Më datë 15.03.2019 është protokolluar, si dhe më datë 01.04.2019 u është dërguar kërkesë subjekteve të licencuara në këtë fushë, me qëllim llogaritjen e vlerës së kontratës për uniformën për vitet 2019-2023, e ndarë në 6 lote, përgatitur nga grupi i punës, i caktuar sipas urdhrit të 22 janarit 2019, shtetasit Gëzim Sala, Zenel Hyka dhe Marsida Gargaj, dakordësuar nga Janaq Xhelili, Theodhori Gravani, miratuar nga drejtori i Përgjithshëm i Policisë së Shtetit. Bashkëlidhur është dërguar pasqyra e përllogaritjes së vlerës së kontratës për uniformë policie, stema, shenja dhe grada, për vitet 2019-2022, hartuar nga Vojsava Çopani, Zenel Hyka, dakordësuar nga Theodhori Gravani, Janaq Xhelili, miratuar nga drejtori i Përgjithshëm i Policisë së Shtetit. Në këtë pasqyrë janë përcaktuar nevojat e DPPSH-së për artikujt e uniformës së Policisë së Shtetit, për 10 uniforma, sasitë dhe vlera e tyre e ndarë në vitet 2019, 2020, 2021 dhe 2022 me një vlerë të përllogaritur prej 2.434.015.880 lekë pa TVSH.
Me “e-mail”-in e datës 19 qershor 2019, titullari i organit qendror blerës, Edlira Naqellari, u ka kërkuar përfaqësuesve të autoritet kontraktor, Gravani, Mulla, Xhelili dhe Hyka, rishikimin dhe përshtatjen e termave të referencës për këtë procedurë prokurimi, si dhe duke vënë në dukje që BP-ja është në pritje të dërgimit nga DPPSHja të dokumentacionit teknik për prokurimin e këpucëve të Policisë për 2019-2022, duke theksuar se prokurimi i uniformave dhe këpucëve është dakordësuar të zhvillohet njëherësh në një procedurë prokurimi të ndarë në dy lote. APB-ja i është drejtuar me shkresë drejtorit të Përgjithshëm të Policisë me 01.07.2019. Më 03.07.2019 Drejtoria e Përgjithshme ka dërguar dokumentacionin teknik për prokurimin e uniformës dhe këpucëve. Po kështu, është dërguar dhe pasqyra e testimit të çmimeve të tregut, ku janë pasqyruar ofertat e ofruara me çmimet për njësi sipas subjekteve që u janë përgjigjur ftesës, ku janë përgjigjur 4 subjekte. Është dërguar dhe llogaritja e nevojave për këpucë, 9 lloje, në sasitë dhe vlerën e ndarë sipas votave 2019, 2020, 2021, 2022, me përllogaritje të vlerës totale prej 655.168.560 lekë.