Kodi Zgjedhor, Kushtetuesja hap listat e kandidatëve, rrëzon herësin e 10 mijë votave
“Zbatimi i herësit në praktikë sipas pikës 3 të nenit 163 të Kodit tregoi se ishte një mekanizëm disproporcional në raport me qëllimin e tij”
Gjykata Kushtetuese rrëzoi herësin prej 10 mijë votash për të marrë mandatin e deputetit për ata kandidatë që janë poshtë listës fituese, duke hapur në këtë mënyrë listat. Gjykata zbardhi dje vendimin e plotë të saj lidhur me interpretimin e pikës 3 të nenit 163 të Kodit Zgjedhor, i cili përcaktonte mënyrën se si shpërndaheshin mandatet e deputetëve brenda një partie në garë. Gjykata vendosi shfuqizimin e pikës 3 të nenit 163 të Kodit Zgjedhor, si të papajtueshëm me Kushtetutën. Në argumentet e saj, Gjykata vlerëson se pika 3 e nenit 163 të Kodit Zgjedhor, në disa zona zgjedhore me numër të vogël zgjedhësish ose me numër të ulët të mandateve, e shndërron votën parapëlqyese në të drejtë iluzore, pasi cenon thelbin e së drejtës për të zgjedhur. Duke analizuar zgjedhjet e 25 prillit, Gjykata çmon që pavarësisht se në çështjet e sistemit zgjedhor ligjvënësi, si rregull, është i lirë të veprojë brenda hapësirës së tij normuese, duke përcaktuar qartë dhe rast pas rasti qëllimet që kërkon të arrijë, në rastin konkret zbatimi i herësit në praktikë, në masën e përcaktuar nga pika 3 e nenit 163 të Kodit Zgjedhor tregoi se ishte një mekanizëm disproporcional në raport me qëllimin e tij. Vendimi i Gjykatës Kushtetuese do të detyrojë Parlamentin e ri që të bëjë ndryshimet e duhura në Kodin Zgjedhor, ndërsa me këtë vendim u heq të drejtën kryetarëve të partive që të përcaktojnë renditjen e kandidatëve në një listë preferenciale. Ishte Partia Bindja Demokratike e Astrit Patozit dhe Partia Lëvizja Demokratike Shqiptare e Myslym Murrizit që kërkuan shfuqizimin e pikës 3 të nenit 163 të Kodit Zgjedhor.